Upat Chin miphun hawi hna,
A liam cia kum 75 ah Chin miphun pi nih ralṭha ngai in khuatlang uktu khuabawi le ramuk phung cu hlawt in Zaukphung (Democracy) kan rak i thim. Kan rak i thim ni ah Chinram chung ummi peng le tlang vialte kan rak tling dih hna. Mah lio caan i Chin miphun kan lungput nih a langhter mi hna cu; Miphun le Ram kong ahcun peng le tlang um ti loin lungrualnak, bawi phun le sal phun thleidannak um ti loin kan i khat dih lai, kan ram le miphun kongah kan mah tein aa tawrel khomi miphun kan si ko timi hna hi an si.
Cu biachahnak sunglawi cu 1948 February 20 ah kan rak tuah, i nihin ah “Chin Miphun Pi Ni” tiah kan auh. Miphun pakhat kan sinak langhter le fehternak dingah 1947 Pinlong Hnatlaknak min kan rak thut lio zong ah, mah tein khuakhan lairelnak a ngeimi ram pakhat si ding in min thut a rak si. Asinain, cu minsenthut mi cu nihin tiang kan saduhthah tlamtling kho lo dingin kawl ralkap a phunphun in dehcawh le rialdip kan tong.
Ralkap hriamnam le thahrum hmang in 2021 February 1, ah uknak a lak ṭhan hnu in kan ram ah kahdohnak tampi a chuak. Kan miphun chungin nu le ngahchia telh in minung 412 leng an nunnak a liam cang. Mah inn chuah takin ramchung khua dang le hmun dang ah a tli zammi thong 70 (IDPs) leng kan phan cang. Ramleng tiang pet in a tli zammi thong 50 (Refugee) leng kan phan cang. Cu lawng cu si loin inn le lo khangh le hrawhpiak mi hi 2100 a phan cang.
Cucaah nihin ah kan miphun nih lungrual tein ralkap uknak ṭhalo cu fak piin doh caan a si i miphun caah nunnak a pe cangmi hna an phu kan hlam caan zong a si. Vakok le Chokhlei nun a ngeimi miphun kan sinak cu nihin ah kan langhter caan a si. Kan miphun lungput muru a simi lungrualnak he fek tein kan dir chung paoh cu teinak a hmumi Miphun kan si.
Kan umnak ram Norway Cozah pi zong nih atu lio kan miphun le Kawlram pumpi sining hi nan kan theihpi ding le nan kan ṭanpi i, UN Security Council cabuai cung i khuakhan lairelnak tuah tik zongah fak piin kan kong nan kan aupiak dingah biacah kan in duh hna.
Norway ram um Chin miphun hna zong nih Norway Cozah uktu hna sinah kan ram le kan miphun kong chim dingin timhlamhnak le rian kan ṭuannak ah nan kan dirkamh ding le thazaang nan kan pek ding zong CCN nih kan in sawm hna.
Nihin cu kan Miphun Ni a si bantukin miphun pakhat kan sinak a langhter tu; kan Thuam dawh, kan Hla le kan Lam he sunglawi khun in hmang cio ding in kan in sawm hna.
Chin Community in Norway