Norway hi ram nuam ram ttha a si i thluachuah kan dawng kan ti len ko bu zongah kan kaltakmi kan sunghmi zeimaw cu a um cio theu lai tiah ka ruah. Kei zong a um len ve ko. Ahlei in langhter ka duhmi cu tuar khawhnak ka sunghmi kong a si.
Dukchiat: Rimrua ka chei lo, duk a chia chin lengmang. Malay le lailei tlungmi cu nan i fiangtuk ko kha mu.
Ttawnttai: Fikfa le hmaifa lakah thu thluahmah in hngilh tawnmi kha hika cun ihphah thuat zeizah hmanh thleng u sih law lungtlin ngaingai um dawh a si lo.
Duhfah: Atu ka mawtaw chiahrute khi ka rak cawk ka ahcun kai lawmh ning le ka thathawh ning hi amak, Pathian zong ka lawmh. Atu ahcun, atu ahcun EU control tuah ding hmanh hi a godkjent sual lai a phangmi ka lo cang.
Lungpuam: Malay ahcun lubik i boss te nih bengh pah bu zongah dai tein ttuan si ko nain hika cu ngaih nuam tein klage an kan chimh hmanh ah thin tawi phun in kai laa.
Thathut: Suimilam 12 chung rak tuan tawnmi kha atu cu rian i tthial i 8 chung ttuan ding hmanh ka ngeihlah ngai cang.
Ralchiat: Thaizing kong hmanh a fiang lomi, palik ttih bu le harsatnak tampi lakah a rak tlawm ngaimi ruahchannak pelpawi te he ralttha ngai in ka rak i zuam tawn. Atu cu hnangamnak ram ah kan um nain afiangmi pinleiah ruahchan ding a tlawm i zeimaw sual lai phannak tu a uak deuh.
Thinlung a der: Lungtthawng ngai in harsat sifah phunphun ka pah tawn nain atu cu mi harsa hna hmanthlak zoh ding hmanh ah ka lung a tthawng kho lo.
Ttial vima ahcun a tam lai. Minung cu pawngkam hoih in a nung khomi kan si ti hi ka zumh caah ka thinphang lo. Nain a cunglei langhtermi hna hi tthancho nih a kenmi minung kan man an si ahcun man nei lo minung si ko ning law acunglei hna tu hi ka sinah ready in i ngeih kho peng ning law cucu ka duh deuh, hei ti ning law Malay ah va kir ti ka hau men hnga.
(Editor note: Cattialtu hi Norway ram Sandnes khua ah a chungkhar le he khuasami asi. Rozenpa tiin a hawi le nih cun auh asi. )