Lai Tuanbia [Khawmhsuat]

0 Comments

Kuarbungbel

Khua pakhat ah Kurbungbel an timi tlangval pakhat a rak um. A mui a chiat tuk ning hi a ruh a ngawi, a mit a cei, a ngal a kawi. Thlalang aa bih ah cun amah le a mah hmanh aa ttih ti a si . A mui a chait tuk ah hin innleng hmanh ah a chuak ngam tawn lo i innchung tu ah hin aa benh deuh tawn ti a si.

Voi khat cu innchung ah Caicimte a tlaih i ka thah lai a ti ah khin Caicimte nih cun, “Ka pu Kurbungbel,zaangfahnakte in ka that sawh hlah, ka thlah sawh ko. Nangmah caah nupi kan lawkpiak lai,” a ti. Kurbungbel nih cun, “Hitluk ka mui a chiat hi….zeitindah an ka duh khawh lai,” a ti. Caicimte nih cun,”An in duh ko lai.” a ti i Caicimte cu a thlah tthan. Caicimte cu unaurual pathum chuak te inn aha va kal i ,” Ka pile, ka pu nan fanu lakah pakhat tal Kurbungbel nan vat ter lo ahcun nan chung tein nan ci a mit dih lai,”  a ti hna. Cule cangka Caicimte nih cun lo diam a kal tak hna ti a si.

A nu le a pa cu an khuaruah a har i cuti ci mih dih nakin cun kan vatter ko lai ta, an ti. An fale lolam tlun cu ab hngak. An upa deuh nu cu a rak tlung i a pa nih a rak don. “Ka fanu, Kurbungbel nan vat lo ahcun nan ci a mit dih lai a kan ti i nangmah nih teh na vat ko lai,” a von ti. An fanu nih cun, ” Nemmam. Kurbungbel vat nakcun kan chung zapi kan cu mih dih hmanh ka duh deuh,” a ti i a duh nemmam lo. A lainu cu lo lam in a rak tlung ve i a pa nih thil sining a von chimh ve i a pa bai a dih hlan ah , “Nemmam, Kurbungbel vat nakcun kan chung zapi kan ci mih dih hmanh a ttha deuh,” a ti i a duh lo . A nu le a ka pa cu an thin a phang tuk cang. An fanu hniangte lawng a taang cang ,zei ti awk an thei ti lo. A fanu hniangte cu lolam in a rak tlung i a pa le a nu nih an hei don. A åa le a nu nih, ” Kan fahniang dawt, tiin an von don i thil sining cu an von chimh ve. An fanu cu aa ruat i ,a zenh tuk bu le a duh lotuk bu tein, ” Ka nu le ka pa , kan chungte i kan ci mih nakin cun ka vat ko lai,” a ti hna. A nu le a ka cu an i lawm tuk i an zitmuai len.Cuticun Kurbungbel cu an vatter. A sinain Kurbungbel lo a kal karah cun a nu le a pa inn ah a va leng peng hna. Zan lawngah hin a ttin tawn.

Voi khat cu an khua ning tein tiva ah kan deng hna lai an ti i Kurbungbel zong an sawm ve . An nu nih cun thil a timhpiak i aa thawh ve. Tiva an va pha i hru cu an denglen. Tlun a zat hrawngah khin ngathaisawn a von thlih . Ngathaisawn nih cun, ” Rak ka thlah, na ka thlah ahcun na mui hi kan remh dih lai,” a ti. Kurbungbal nih cun ngathaisawn cu a thlah .Ngathaisawn nih cun, ” Thing hnah va la, ” a ti i thinghnah a lakter . Thinghnah in cun a hnuai dih i, “zu tawngh lo le va tawngh lo ti ah vaa kholh,” a ti. Kurbungbel cu a ruh a renh dih i mi pumrua ttha ,muidawh taktak ah aa cang, aa dawhngin hi zoh cim loin aa dawh ti a si.

Zanlei cu a hong si i tiva kal pawl cu an tlung thluhmah. A nupi nih cun innka hram in ka va pa hi a rak tlun bal hnga lo tiah a rak cuanh peng. A vapa hmanh a thei ti lo. An inn hmai a phak ah khin cu tluk mui dawhcu…. ahodah a si hngatiah a lungchung tein a ti len loiah, an inn chungah cun cu pa cu a hung lut .” Kan nu, a hodah na cuanh le ko, ka rak tlung cang hi na thei lo maw,” a von ti. An nu nih cun ,”Ka va pa hen ta ka cuanh ko. Hawi dang cu an rak tlung thluahmah cang, ka va pa belte tlun le tlun lo a zal ti lo.” a hei ti. Kurbungbel nih cun,”Keimah hi pei na va ka si ko cu,” a von ti . A nupi nih cun a zum kho lo.”Nangmah cu ti tluk in naa dawh, na pumrua le a ttha, kei ka vapa cu mimuichia, mi ruhkawi pei a si ko cu,” a ti. Kurbungbel nih cun,” A si ko e, keimah hi ka si ko. Kan tlun lai ah khan ngathaisawn ka tlaih i ngathaisawn nih ka thlah law, na ruh kan remh lai a ka ti i a ka remh bai a si,” a ti. An nu nih cun a zum set lo. Kurbungbel nih,” Kan nu, na pa le sur na hlanmi hna pek pah in ngasa hi va cawih ve hna,” a hei ti. An nu cu aa nuamh tuk ah a vapa cu a zoh zong a cim ti lo. Khoika kal hmanh a huam ti lo. A nu le a pa cu ngasa le sur pek ah a va kal ian innleng in, ” Khah, nan sur kan pa hna. Ngasa he ,” a hei ti i lo vurmar ah inn lei ah cun a tli. A nu le a ka cu an khuaruah a har tuk i zei ko dah a si hnga . Upa nu nang va zoh hnik an ti . Upa nu cu a va kal i Kurbubgbel a zohnak ah ttin a thei ti lo. A changtu nu an va kalter ve i a naunu va a zoh nak ah ttin a thei ve hoi ti lo . a nu a va kal ve i cu baak . A hnu ah cun an pa a va kal ve i a fanu ca cu a hmuh ve tikhan aa nuam kho tuk. Hi tluk in muidawh an um ti lai lo a ti ve.

Voi khat cu Kurbungbel cu thual ka tlawng lai a ti i an nu cu nau a pawi caah khoika hmanh ah  chuak lo ding in ti a thanpiak dihm thing a luhpiak dih . A zei zong tein a tuahpiak dih hnu ah ,” Kan nu a lengah na rak chuak hrimhrim lai lo, na chuah sual ahcun na ule nih an in thah sual lai,” a ti ta . An pa cu khual tlawn ah aa thawh. A unu nih cun a naunu cu a hnahchuah i ka nau hi ka thah lai suak lai,” a ti ta. An pa cu khual tlawn ah aa thawh. A unu nih cun a naunu cu a hnahcuah i ka nau hi ka thah lai i keimah nih a vapa hi ka co lai a ti. ” Ka nau, nan vok rawl ba pe cang maw,” a hei ti i a naunu nih cun ” Ka pek cang” a ti. “Nan ar rawl teh,” a hei ti i .” ar rawl zong ka pek cang ti a naunih cun a leh. ” Ka nau ti kan i kholh lai, rak chuak,” tiah a unu nih cun a ti tthan. ” Ka u ,kan pa nih ti kholhnak cu a ka thanpiak dih cang,” a hei ti .”Ka nau ,rak chuak, pipen kan i cit lai,” tiah a unu nih cun a ti tthan . A nau nu nih cun a huam lo. a unu cu zeiti ti awk a thei ti lo. Caan sau deuh a rauh ah khin, ” Ka nau pipen kaa citnak ah Kawl vai lei ah nan pa ka hmuh,” a von ti. An pa hmuh cu a duh tuk ve i a lengah cun a hei chuak i pipencu a citter .Pipen aa thui saling ah khan a unu nih Kurbungbel nupi cu a nam i horkadok ah a thlak ta, A unu cu van tthat a ti i a naunu bantukin aa thuam i durkaruk (tithawl) kha aa pawiter.

Kurbungbel cu a khuatawnnak in a rak tlung i an nu pipen a sihpiakmi tangah khan nau ttah thawng a theih i a thil aa tthum i a va lak hna. A paiper chungah khan a thuh hna. Inn cu a va pha i an nu deu nih cun ” Aw….. kan pa, na rak tlung cang tih,” a hei ti. ” Kan nu,voi dang na lo lo e…. ka thil zong na ka cawih lo ee,” a hei ti.”A si khe, ka philh sual,” a ti i a thil cu a cawih .” Kan nu , voi dang na lo lo ee,”a tha ba lai tiah ti zong na ka suahpiak lo ee ,”  a ti tthan .” A ze….. ka phlih sual,” a ti i ti cun a hei suahpiak. ” Aa .. kan nu, voi dang na lo lo ee, ti kholhnak zong na ka tuahpiak lo ee,” a hei ti i ,” a ze….. a cu ka lungloh cu,” a ti i ti kholhnak cu a rannak in a hei tuahpiak.” Aa, kan nu, voidang na lo lo ee, voi dang ah ka tlun le cangka tein ka thil na ka cawih i zei thil dah na ka phurj tiin na ka tteo pei, a tucu na daithlang ko ee ,” a hei ti. ” A zem ka philh ko lo maw zei,” a ti i zokzok in a paiper cu a hei zuanhnawh. A von kau cu a naunu le a fate cu a hmuh hna i a lau i zokzok in an inn lei ah a tli. A tliknak ah durkaruk aa pawitermi zong kha a thlau dih.Cuticun an nute cu paiper in a chuah i nuam tein an um tti an ti. Cu cial.

Categories: