2023 Lokalvalg Ah Thimfung Thla Cio Hna Usih

Norway kan i hruainak ah thimnak (election) dawt 3 a um. Stortingvalg (national level) timi rampi huap a kan aiawhtu hna thimnak, fylkestingsvalg (regional level) le kommunevalg (local level) timi mah le umnak kommune cio ah aiawh-biakhiaktu pawl thimnak hna an si. Hi thimnak pawl hi kum 4 danah tuah an si; stortingvalg hi a dang tein tuah a si tawn, Fylke le kommunevalg belte hmunkhat ah tuah a si tawn.

Tukum 2023 thimnak cu regional le lokal level thimnak a si. Mah le ainaihbikmi aiawhtu thimnak a si caah “Lokalvalg” ti zong in an ti. Kommune 357 le fylke 14 caah thimfung thlak cuahmah lio an si. August 10 – September 8 tiang thinfung (forhåndsstemme) thlak chung khawh a rak si cang. 1,27 million nih thimfung an thlak chung cang. 2019 lio ahkhan 0,9 million lawng nih an rak thlak chung caah thimfung thla chungmi an karh ngaingai. Thimnak ni (valgdag) cu thaizing 11 September khi a si. Thimfung result umtuning cu thaizing k. 9:00 hrawng in, zoh khawh a si cang lai (zohnak: valgresultater.no).

Lokalvalg ah thimfung thlatu hna nih theih a biapibimi hna cu; kanmah le umnak cio ah zeibantuk party nih dah a tanglei kongah ttha bikin a kan tawlrel khawh bik lai timi a si;

1. Hngakchia mino fimcawnnak

2. Pitar putar zohkhenhnak

3. Khuachung lamsial le tlawnkainak

4. Pawngkam tthanchonak

5. Nunphung le zatlang kilven tthanchonak

Kum 18 a tling cangmi paoh, June 30, 2023 tiang na address umnak kommune ah thlak khawh a si.

Democracy i a muru cu thimfung thlakho hna nih, kan aiawh seh timi party le minung thimfung peknak in kan pawngkam poltics biakhiahnak ah i tel ve kha a si. Cucaah local thimnak ahcun, mah umnak pawngkam politic umtuning/sining theih a biapi (think local).

Chin Community in Norway (CCN) zong nih Norway ramchung khuasa kan Chinmi, thimfung thla kho paoh nih kanmah umnak khua thil sining zohchih in le fimkhur tein thimfung thla cio dingin thazaang pek le sawm kan in duh ko hna!

Chin Community in Norway