Shan Miphun Hna Caah Rianttuanmi Norway Nute Cakuat

Inger Lise (Lisa)/Nang Mwe Nguen

Burma ram Shan miphun hna sin ah a fimthiamnakm,caan le ngeihchiah vialte peek in mibawmh-zohkhenh, biachimpiak le dirkamh rian a ṭuan cuahmahmi Inger Lise (Lisa)/Nang Mwe Nguen nih a hawi theihhngalh hna sinah a rianṭuannak kong tete ca in thawngthanhnak a rak kan tuah pah tawn. Nikum 2011 a rianṭuannak kong he pehtlai in january, tuthla ah kumthar cakuat bantuk in a rak kan kuat ṭhan. Hi a cakuat hi mi tlawmte lawng nih rel loin mi tamdeuhpi nih rel thei kho ve hna seh ti ka duh ruangah, CCN website ah na rak kan kuatmi ca kan taar piak lai a ngah lai maw, tiah ka hal i amah  nih a ṭhatuk ko a ti caah a rak taar piak. Arel huammi hna caah santlai le relnuam asi lai ti ruahchannak ka ngei ko. English he Norsk he holh phun hnih in an kan kuat.

Akong le a rianṭuannak tlawmpal

Mandal (vest-agder) Norway ummi asi nain Burma caah a pum ai peek nak kum 13 asi cang, abikin a rianṭuannak hi Tai Hope timi mibawmmi buu fate asi i, amah chimnak ah cun a rianṭuannak ah punghman tein phaisa a lutmi mizei sin hmanh in ka hmu lo ati. A pikpak in pekmi bawmhnak in a ṭuan cuahmahmi, zumhnak in kar a hlangmi asi tinak asi. Norway ah sianginn videregående tiang a dih hnu ah midang bantuk in sianginn kai peh loin mi bawmh rian tu ai ham, amah nak in fimnak, eidin a herh deuhmi hna caah pumpeek in hawikom vialte kaltak in a ṭuanmi nu asi.

A rianṭuannak in Norway lei a rak tlun tawn ah hin, Norway um Burma mi hna kong hi internet google in ka kawl tawn a ti. Google nih tambik a ka chimh khawhmi cu Norway um Chinmi nan kong asi a ti. CCN website zongah a rak lut tawn i pehtlainak amah nih an kan tuah hmasa. Ka miphun unau pawl pei Norway tampi nan rak um hi ka ti i thazaang tamtuk ka ngah a ti, Mandal, Lindesnes hrawng khuasa kanmah Chinmi hna sin zongah a rat caan tete ah i telve chawnhbiaknak a ngei kho tawn, Chinmi hna zong nih an dawt ve i, biachimnak le rawlei sawmnak tete hna an rak tuah piak tawn.

Achim tawnmi cu, ‘Tai Hope’ timi  min in rian a ṭuannak hi midang buu ngan pipi bantuk in cozah le buu dangdang hna sinah bawmhnak ahalmi asi lo, mah cawlcanghnak le pumpak in mi bawmh aduhmi hna nih an ka bawmhmi te in rian a ṭuanmi ka si, bawmhnak an ka peekmi hi a herh taktak mi hna sinah direct in a kal colh kho a ti. Rawlttam-tihal, damlomi hna caah a herhmi ti le rawl le si in bawmhnak a pek hna lawng siloin, hmailei ah a bawmhmi hna nih anmah tein an cawl khawhnak ding caah tiin, fimthiamnak, rianṭuanning tibantuk cawnpiaknak zong a ngeih chih hna.

A cakuat chungah a ṭialmi tlangkhat te ka rak leh piak:

Nihin tiang, Norway leiah vanlawng hmete in vun rat han i, ai dang tukmi nunning vun nun han ding ka ruah ah kai redi kho rih hrimhrim lo. Mikhual dangpi ka si ko buu ah ka dawtmi le ka bawmh hna miphun, ka miphun ka ti khawhmi Shan miphun hna sinah ah ka me a rem, kai nuam. Nain ka chuahkehnak le ṭhannak ram ka miphun asi mi Norway chungchuak ka si ko nain, midang khual pi bantuk in kai lawh ter. Vawlei pahnih, nunphung pahnih kai hrawm khawh vemi hi ka thinlung chung tein kai lawmhbikmi asi.”   

An cakuat hika ah full in rel khawh asi.

Letter from Inger Lise (Lisa)/Nang Mwe

 


 

Scroll to Top