Fremskrittspartiet (Frp) tuchun ah kum 40 a tling. April 8, 1973 ah, Anders Lange nih a rak thawkmi asi i, a rak thawk lio ah abikin an rak i timhmi cu, state cozah sinah peekmi tax tlawmte lawng peek i, pumpaak duhthimnak cungah cozah i thlak ve naak a tlawm khawh chung tlawm seh ti duh ruangah an rak thawkmi party asi.
Zapi nih hi party kongah theih bikmi cu, ramdang mi a rem lomi, Norway ah ramdang mi lutchuak hardeuh ding aduhmi party ah ruah le theih bik an si. Anmah duhnak ah cun Danmark, Greek, Japan le UK te hna bantuk in ramdangmi kongah politik ngeih a duhmi an si.
Adang kongah zeidah an duhmi asi ti zapi nih theih lomi tete an um ve. Bianaah, Frp nih ram (state) ah peekmi tax (skatt) tlawmdeuh seh an duh mi te hna kong hi asi. Tax phun tampi lakah tlawmdeuh seh ti an duhmi hna cu, rian ruang phaisa lut, ngeihmi chungin peekmi le ro le rah tax te hna an si.
An politik a tlangpi in zoh ahcun, ram cozah (State) nih ram chung minung hna (citizens) hna cung i ai thlak khawhnak thazaang a tlawm khawh chung in tlawm seh ti khi an duh. Pumpak cio thil ti khawhnak a tthancho deuhnaak hnga ca tuah cozah nih bawmtu ttuanvo ai laak ding asi tiah a ruatmi an si.
Frp website ah an ttialmi pakhat cu, kum 2008 ah Norway ah tax kan peekmi hi billion 745 asi, cucu mah hlan kum ah rak peekmi tax naakin 15% a tamdeuh – billion 52 hrawng in a tam deuh ti asi. Cucaah hi party nih tax tlawmdeuh in cozah nih an tuak naak ding kha biatak tein a au pi tawn.
Ramdang caah bawmhnak kong tu ahcun, Frp nih tlawmdeuh bawmh an duh. Phaisa thazaang in kan bawmhmi hna nih an ram tthanchonak – kan duhmi- a chuahpi lai lo, timhtuahnak a tthami le ttha tein tuaktan hnuah peekmi bawmhnak tu nih tthanchonak a chuahpi khawh deuh lai ti a ruatmi an si.
1978 – 2006 tiang Carl I Hagen nih a rak hruai hna, 2006- tutiang cu Siv Jensen nih a hruai hna.
Party website cu : http://www.frp.no