Chin National Front (CNF) le Chin ramkulh cozah aiawhtu (kosale) hna cu nihin zingka suimilam (10:00)am ah Chin ramkulh khualipi Hakha khua sohlohzi zeihtha ah daihnak ser dingin ton biaruahnak an ngei cang.
Hi an i tonnak ah hin CNF leiin Dr. Sui Khar, Pu Ral Hnin, Dr. Salai Andrew Ngun Cung Lian, Pu Solomon, Salai Peter Lian, Ko Hla Hton, Ko Thet Ni, Pu Rokhawma, Khin Maung Lay le Pu Ngai Cia Thang hna an si i, Chin ramkulh cozah leiin ramri humhimnak lei vuanci bohmuci Zaw Min Oo, ramkulh cozah chungttuan(secretary), ramkulh upadi bawizik (upadichoh) le ralkap biuhahmu hna an si tiah thawng kan theih.
An i tonmi kong he pehtlaiin zeihmanh theih a si rih lo nain daihnak ding caah tthat lei a panh ko lai, tthat lei cu a panh hrimhrim lai tiah ruahchannak an ngeih kong Chin ramkulh thingram lei vuanci U Kyaw Nging nih a chim.
“An i ceihmi a dih rih lo caah thil sining zeihmanh theih a si rih lo. Tthat lei cu a panh hrimhrim ko lai tiah ka ruah” tiah amah nih cun a chim.
Ramkulh level daihnak caah ton biaruahnak an ngeihmi cu thaizing ah a dih ding a si cang i, Hakha khuanu, khuapa hna le biaknak lei hruaitu pawl hna nih CNF kosale hna le ramkulh nawlngeitu kosale pawl hna cu zanriah i hrawmtinak le thlacamnak zong ngeihpiak hna dingin timhlamhnak an ngei tiah theih a si.
Hmet law CCN bawm asi lai tih khi hlawn u law a tha ding, Nan website leh account phih nan duh loh ah cun. An phunghram rak rel than u law. An theih sual ah cun vawlei pumpiah CCN hming a sia lai tih theih dingah a tha.
Kan i lawm! Tu bantuk in kan theih lomi nan kan chimhmi hi pakhat le pakhat i bomh cio asi hrim ko:-)