3rd Europe Chin Sport Tournament & 4th Norway Chin Mino Civui

Miphun hawile vialte hna,
 
Europe khuasa Chinmi hna nih kan i ngaihbikmi celhzuamnak puaipi  le Norway mino civui cu kan hun naih tuk cang i a ni lawng ai duh cang!  Atanglei ah puai kong he pehtlaiin a tlangpi in thawngthanhnak kan hun tuah duh. 
 
Program Schedule 
 
25-30 tiang program schedule zong hika ah zoh khawh asi.  Ahmun zongah kan taar chih te lai. Atlangpi in zoh ahcun, 25-27 July khi NCCYF program an si i, 28-30 July khi Europe Chin programs hna cu an si.  Ahmasa nihnih ahkhin krihfa i cawnpiaknak le i hawikomh program focus an si lai i, a donghnak lei ni 2 chung khi, sport (football, volleyball) le Europe Chin mi hna i hawikomhnak kha tinhmi cu an si.
 
Puai luhnak min peeknak [ Registration ]
 
Thawng kan thanh cang bantukin; hi puai a ra ding paoh nih luhnak fee peek a herh. Azat cu hika ah zoh tthan khawh asi. Tutiang online in ka ra lai tiah thawngthanhnak a tuah cangmi 150 hrawng kan si. Caan zeimawzat laakin online register a tuahmi nan dihlak cungah kan i lawm. Ara ding tiah tuakmi naakin kan tlawm tuk rih caah kan zuam piak  hram rih ko uh tiah kan nin nawl ko hna. Online register tuahning tutorial zong a um.  Phaisa a pe lomi cu puai ah tel khawh asi lai lo. Aruangcu, minung zeizat caah tiin thil herhmi vialte tuaktan dih asi caah hi ti hin biachahnak kan tuahnak asi.
Puai Zohkhenhtu [Security Team]
 
Security Team minung 20 kan i thim kho cang i cu hna nih cun, 25- 30 July tiang, kan puai ningcang tein a kal khawhnak caah an kan tawlrel zohkhenh te lai. Kanmah le kanmah ai zohkhenh ding kan si lai caah pakhat le pakhat i theihthiam, dawtnak, hmuh thiamnak le upatnak he kan security team members pawl hna cungah kan ngeih khawh cio ding zong a piapi ngai ko. Security kongah biahal duhmi um ahcun: Pu Tha Hnin Thang [Mobile: 41504516] sinah hal khawh asi lai. 
 
Norway Palik kan sawm hna
 
Puai lio Security kong he pehtlaiin Rogaland Police zong thawngthanhnak tuah asi. Kan puai chung vialte, nikhat zanlei paoh ah voikhat lengkai kho dingin kan i ceih hna i, anmah zong nih kan nin zuam piak hna lai an kan ti. Hi police hna hi kan puai hna an kan hnawh tu ding siloin ai telmi vialte him tein le nuam tein caan kan hman tti khawh nak ding caah a kan bawmtu dingah kan sawmmi hna asi ti kha kan hun langhter fawn.
 
Rihnak si le Zuu
 
Rihnak si (Drug), Zuu (alcohol) le kuak tibantuk kongah kan i ralrin ngaingai kan herh lai. Aruangbikcu, 2011 Norway civui kan rak tuah lioah, zu ding le a ri mi hna nih i ralring lo ngaiin, kan cawlcangh pinah puai tuahnak he ai naih bikmi dawr (Joker) ah kan duh zat in beer kan cawk caah asi. Ahnuah an kan chimhmi cu, 2011 lio bantukin nan um rih ding asi ahcun, Hall kan nin hlan kho hna lai lo an ti. Cucaah tutan cu kan i ralring cang lai, pawngkam hnahnawhnak kan pe hrim ti hna lai lo tiah bia kan i kam hnu ah an kan sianh tthanmi asi ti kha a ra ding hna nih kan philh lo a hau te lai.
 
Summer Europe Chin Concert
 
28 July zaan khi, Norway mino pumpaak thazaang chuahnak le vision an ngeihmi thawngin USA in kan Chin hlasak minthang Milla Dawt Hniang  le Burma in tingtang tumthiam Mang Za Kam an kan sawm piak i concert tuahpiak an kan timh. Hi puai caah luhnak ticket zong an zuar cuahmah i Norway chung a ummi nih cun ai cawkcangmi zong nan tam lai tiah ruahchannak kan ngei.  Thazang pee cio hna usih, kanmah miphun nih kan i chawrmi hna artists an si caah zoh phun tuk le ton phu tuk zong an si ti zong kan in thanh chih hna.
 
CCN General Meeting [29 July kl 16:30  ]
 
Chin Community in Norway (CCN) cu kum 10 a tlin lawng siloin upa thim tthan a zat cang caah 29 July khi nazi 16:30 in hruaitu upa i thimnak, phunghram zohnak a um te lai. Puai a rami Norway mino le upa vialte i tel khawh cio i zuam hna usih, CCN a rianttuannak hma a kal deuh khawhnak ca zongah thazang, ruahnak chuah khawh cio i zuam hna usih. 
 
Zuamnak a phunphun
 
Tutiang kan program ningin cun, Football puai 7 a um lai. Ai zuam ding hna hi Europe ram dangdang in a rami an si lai. Volleyball (nu, pa) zong a um lai. Cun, hlasak zuamnak le Europe Chin Menrihei (Chin Miss) zong zuamnak a um lai caah kan i ngaih ngai ko. 
 
Football & Volleyball contact persons;
1. Chan Cung Hnin [Mob:+ 47 401 67 861]  
2. Bawi Dawt [Mob: +47 94170 422] 
3. Hei Ling [Mob: +47 917 42349 ]
Hlasak & Menrihei kong ah contact: 
1. San Mary Lian [+ 47 948 87 519]
  
Online Livestream
 
Kan puai a hramthawkin a dongh tiang, internet in livestream tuah kho dingin timhtuahnak kan ngei. Online address cu;  https://new.livestream.com/accounts/1139287/events/3100481 ah asi lai. Zohkhawhnak caah Facebook account silole Livestream website ah register tuah, login tuah a herh lai.
 
Lunglawmhnak
 
Kan civui pi caah inntek dirhmun in thazaang an kan chuahpiak lawng siloin Vok pumpi pakhat zong a kan hlutu, Immanuel Baptist Church upa vialte le member pakhat cio nan cungah lunglawmhnak kan ngei. A kapkip in mah le ttuanvo laakmi cio cungah caan le thazaang a chuahtu hna committee pakhat cio upa  hna le member hna nan cung zong ah lunglawmhnak chim cawk lo kan ngei rih fawn. Tilerawl chuang dingin ai hammi Egersund Chin nubuu pawl cung  zongah kan i lawm. Pathian nih kan i siannak, dawtnak nan ngeihmi cungah a let tampi in thlachuahnak in pe ko hna seh.
 
Upatnak he,
 
1. Van Thang
Convener [Europe Chin Sport Tournament Main Committee] 
Mob: +47 938 65 013
Email: zacuan.thang@gmail.com  
2. Peter Sang Lian Thang 
President [Chin Community in Norway]
Contact: +47 454 86 016
Email: petersang26@gmail.com 
3. Salai Cung Cem Bik 
Chairman [Norway Chin Christian Youth Federation]
Contact: +47 418 51 562
Email: cungcembik@gmail.com
Scroll to Top