*Na konglam tawifiang tein van kan chim ta law?
SBH: Ka min cu Sang Bik Hmung a si, kum 23 ka si. Ka pa min cu Pu Ni Khar a si i, ka nu min cu Pi Sung Thluai a si. Unau pathum kan si i keimah hi a hniangbik ka si. Ka chuahnak cu Hakha a si i, ka khua cu Phai khua a si. A tulio ka umnak cu Luleå, Sweden ah a si.
*Na tungsan (height) le na rihzaan (weight) van kan chim ta law?
SBH: Ka tung hi 5´7´´(172cm) a si i, ka rihzaan hi pounds 211,6 (96kg) a si.
*A tu na tuah lio mi le hmailei na chunmang?
SBH: A tulio cu ka um sawh ko, sianginn kai ding (university) ka sawkmi ka hngah lio a si. Kai kai timhmi cu economy(business) lei hi a si.
*Paih lei ah van kal colh usihlaw. Sweden lei zong ah Paih ah Champion a hmubal an in ti, voi zeizat dah Lai Paih ah hin Champion na hmuh cang?
SBH: Aw si…Sweden ah hin Lai Paih hi 2017 in kan thawk, kum3 kan tuah cang i mah a kum3 ning te hin keimah nih Champion ka hmuh. A tutan Rogaland, Norway he hin cun Champion voi4 nak ka hmuh a si.
*Tutan Rogaland, Norway ah tuahmi CND ah hin Lai Paih ruah bak ah maw na rat? Cun Champion hi ka hmuh hrimhrim lai tiah zumhnak na rak ngei maw?
SBH: Mah Paih ruang zong cun a si pah ko nain Paih pakhat ruang lawng bak ah cun ka rat a si lo, a tu CND nan tuahnak Rogaland ah khan ka U a um i kan i hmuh lo nak zong a sau ngai caah an mah tlawnpah, cun Paih zong cu ka duh pah caah ka rat cu a si. Champion hi ka hmuh lai ti zumhnak ngeihpah in ka rat mi a si ko.
*Paih hi na cawngbal maw? Zeitik in dah paih bual ah hin na rak chuah hmasa bik?
SBH: Paih hi mah tipi cun ka cawng loh ka ti ko lai, Lai lei(Hakha) tu ah cun kan hei i pai pah sawh tawn. 2016 Europe civui i Paih an tuah kha a hmasa bik Paih bual ah ka chuah a si.
*Norway lei le Sweden lei Paih kan tuah dan na hmuh ning?
SBH: Aw… mah tipi cun ai dang tuk in ka hmu loh. Sweden lei cu mizong kan tlawm i zuamcawh paih zong kan tuah kho ve lo zatlang paih lawng kan tuah khawh ve. Norway lei hi mi nan tam ko nain tutan kha cu Rogaland lawng nan si i zuamcawh zong nan tuah kho ve lo i zatlang paih lawng nan tuah ve i kan tuah dan ai khat ngai ko tiah ka hmuh. Mah belte Norway lei ai pai mi pawl hi an thawng deuh ko rua tiah ka hmuh.
*Sweden ram in Norway ah rat in Champion na hmuh tikah zeitluk in dah na lungthin a cawlcangh(Feeling) ning van kan chim ta law.
SBH: Keimah zong Pathian nih a ka dawttuk i kai lawm. Sweden ah cun voi3 tiang Champion ka lak cang tik ah khin, a thar in lakmi si loin lak cia mi a si i ka lungthin zeitin a rak um ti mi zong kha karak theih cia mi a si tik ah Sweden ka lak than kha cu zeiti pi khin a um lo. Norway tu kha cu ka voikhat ratnak zong a si pin ah Norway ah ka voikhat Champion hmuhmi zong a si, cun Rogaland ah voihnih tiang nan Champion a si mi Tha Hlei Cung ka van tei hnu a voi4 nak Champion ka van hmuh kha a sunglawi tuk tiah keimah nih cun ka ruah.
*Hmailei ah Europe huap in Lai Paih hi tuah kho hna seh law nai pai lai maw, cun Europe Chin Paih Champion zong ka si kho te lai tiah zumhnak na ngei maw?
SBH: Europe huap in an tuah ah hin cun keimah zong mino ka si pin ah Paih zong a duh mi ka si i caan ka ngeih ko ah cun Paih ve cu ka duh ko. Minung cu mah ti khin cun chim khawh cu a si lo i mu, ka lak hrimhrim lai ti cu kan i Paih hlan cun ka chim kho loh ka ti lai cu ti, na tein Pathian nih a ka um ko ah cun teinak ka hmuh lai ti cu ka zumh ko.
*Paih bual chuah tikah mi teinak ah hin zeidah a herh bik cem tiah na ruah?
SBH: Paih bual chuah tik ah a biapi bik tiah ka ruahmi cu lungput(mindset) hi a si. Paih kan chuah hlan i kan lungthin a der, cun tihnak le thinphang in kan um ah cun sungh a fawi te tiah ka ruah, cun Paih zong cu thiam a hau ve hrim nain a biapi bik cu lungput(mindset) hi a si bik ko.
*Paih kan tuah cia mi chung ah le nai Paih cia mi chungah na siarem lomi a um maw?
SBH: Mah tipi in siarem lo mi taktak cu a um lo, upa te nih a tha tiah an tuahmi hi a tha ko tiah ka hmuh. A sinain domme(biakhiattu) nih khan a fian lo mi kha amah nih biakhiahnak tuah colh lo in a kam i ventu hna he khan biaruahnak tam deuh ngeih hnu ah biakhiahnak tuah seh law a tha tuk hnga, domme(biakhiattu) lei hi tha deuh in kan tuan/kan tuahpiak kho hna seh law ti ka duh.
*Lai Paih hi hmailei ah a thancho khawh chinchin nak hnga na lungthlitum/ na saduhthah van kan chim kho law.
SBH: Si kan Lai Paih hi a tu ah cun a van thangcho cuahmah ramkip zong in van tuah cio a si, minung tlawmnak zong ah van tuah a si cio tik ah kan Lai Paih hi a thangcho chinchin ko lai tiah ka zumh. A ruang cu CND van tiah khin cun Paih kong hi telh lo awk tha lo ah a van i cang, cun kan nau le zong Paih a um ruang ah hin CND zong ah hin an chuak deuh i an mah zong zuam duhnak thinlung an van ngei chinchin. Paih hi ngol lo tein kan tuah peng ko ah cun a thangcho chinchin ko lai tiah ka zumh ko.
*Kan Chin miphun chung in Paih ah na uar bik mi kan chim ta law. Cun na uar bik nak a ruang?
SBH: Kan Lai Paih ah cun Rung Lian Ceu hi ka uar bik, a ruang cu kan Lai pa ah cun thazaang lei zong in Paih thiam lei zong in pa zabak a si ka ti. Cun Rung Lian Ceu nih hin kan Lai Paih zong hi a thancho ter bik rua tiah ka ruah.
*Biaralkah piin nungak pawl nih theih an duh ngai mi, hnakruh ai hmuh cang rua an in ti?
SBH: Aeeeee hehehe aw si a tulio te cu relationship in ka um lio a si ko.
*Thazaang an petu le mipi sin ah lunglawmhnak le biacah na duh mi?
SBH: Mipi thazaang peknak thawng in kan i Paih zong tha a tho chin i Paih duhnak zong kan ngeih chinchin pin ah Paih zong a nuamh ter ka ti. Mipi thazaang petu cung zong ah lunglawmhnak tampi ka ngei. Cun hmailei zong ah kan nau le a tu ah ai Pai kho rih lo mi hna zong kha Paih khawh i zuam ve hna seh law, kan mah mino nih hin kan Lai Paih hi thancho ter chinchin hna usih ti biacah ka duh.
*Lungsau tein le caan pek in biaruahnak na kan pek caah na cung ah kan i lawm tuk. Hmailei sianginn kai nai timhmi le na saduhthah zong a tlinnak lai thlacamnak zong in kan rak in bawmh ve lai. Good Luck…
SBH: Keizong nan caan tetlak ah biahalnak hna nan van ka tuah i kai lawm tuk ve.
