By Melanie Catinsung Lotong
Biahmaithi ah tial ka duhmi cu, hi bantuk in capar tial zuamnak nan tuahmi ah ka tel kho ve caah lunglawmhnak tampi ka ngei. Bawipa min ka thangtthat!
A pakhatnak ah Norway Laimi caah hmailei ka saduhthahmi cu, caan hi upat hna usih. Tahchunnak ah Norway mi he cun a caan kan upat ngai, meeting ah siseh, rian lei ah siseh, Norway mi he i tawn poh ahcun a caan hi kan upat kho ngai ko, natein, Laimi he cun a caan hi kan upat tuk theng loh tiah ka hmuh. Tahchunnak ah, zerhpi ni pumh zongah nazi 12:00 i thawk hnga dingmi khi 12:30 luanhrawng khin kan thawk. Laimi le laimi kan si ko zongah, caan upat lo hi kanmah le kanmah i upat lo zong a si tiah keimah nih cun ka hmunh fawn. Cu lawng si loin, mino hla cawn ah siseh, khrifabu meeting ah siseh, laimi kan i tonnak poah ah a caan hi kan tloh lengmang. Caan upat lo hi tthanchonak ah a dawn biktu ah ka hmuh. Zeicatiah caan kan upat lo ahcun kan tuah dingmi thil vialte zong kha kan tlolh dih. Caan kan upat lo chung poah cu zeitik hmanhah kan tthangcho kho lai loh tiah ka ruah. Mahcaahcun, Norway Laimi caah hmailei ka saduhthah mi cu caan upat hi asi.
A pahnihnak ah, Norway Laimi caah hmailei ka saduhthah mi cu, mino hna nih fimthiam cawnnak leiah i zuam hna usih law, hmailei ahcun, doctor ttha le zung sangsang i a ttuan khomi zong kan um len te lai ti hi hmailei ka saduhthahnak asi fawn. Norway ram kan um tikah , nunphung pahnih kar lakah a tthang mi kan si caah, thleidan zia thiam hna usih ti hi hmailei ka saduhthah nak asi fawn. A thleidan zia kan thiam lo ahcun, hmailei caan ah miphun thlautu kan si sual lai ti hi phan a um ngai. Cu caah, kan pale hna nih, tu bantukin CND te hna a kan tuah pi mi zong hi, hmailei kan miphun a kilvengtu le a tthancho tertu si hramseh ti hi ka saduhthah a si. Hmailei zongah lungsau tein kan zuam piak ko uh ti zong hi ka saduhthah asi fawn.
Cun a pathum nak ah Norway Laimi caah hmailei ka saduhthah cu, kanmah le kanmah hi i dawcikcek hna uh sih. Khrihfa kan si mi kha dawtnak in langter ve hna u sih, ti hi ka saduhthah a si. Kanmah le kanmah kan i dawt lo a si ahcun, khrihfabu tthanchonak a dawnkhantu hi a si bik ko ruah tiah ka ruah fawn. Kanmah le kanmah kan i dawt lo ahcun, kan miphun dawt lo he khin aa lo fawn. Cun kanmah le kanmah kan i dawt lo ahcun a ho nih dah an kan dawt piak lai? Mirang nu maw silole ram dang pa nih dah kan miphun cu an kan dawt piak lai? Daw hlah ram dang mi nih cun kan miphun cu an daw kho lai lo. Hlan kan pi pu chan in khrihfa cu kan si dih cio hna. Hlan kan pipu nun ning tuanbia zoh ahhin, an rak i daw tuk hna, mah lio chan ah khan mi phun zong an rak i daw i an rak i tanh hna i an rak tthangcho ngai.
A tu bantukin CND ti bantuk hi tanh hna uh si law, daw hna uh sih ti hi ka saduhthah asi fawn. Kan dawt lo ahcun hmailei kan tthanchonak ah dawnkhantu a si lai tiah ka ruah. Norway mi hna kan zoh i kan tahchun ahcun 17.mai hna hi sunglawi taktak in an hmang hna, hngakchiabik in upabik tiang hmanh an chuak dih hna i upatnak an pek. Kannih zong kan miphun ni ah kan lai thil thuam te he chuah khawh i zuam hna uh sih law, upat nak hi pe chinchin hna u sih ti hi ka saduhthah le ka chunmang a si, tiah ka capar tial ka dongh ter.
(Webmaster’s note: Cattialtu hi Egersund khua ah a nulepa hna he khua asami asi. 2019 Chin National Day (Rogaland, Norway) capar ttial zuamnak ah ttialmi asi) .