Norway ah Chin Relief Committee Dirh asi Cang

0 Comments

fwaef

CRCN dirh lio ah a kai kho meeting upa pawl. (Photo: Mang Chum/CCN)

Chin state ah kokek harnak a tong cuahmahmi mipi hna, a rawkmi inn le lo, fing le tlang ser tthannak caah bawm chantu pakhat asi ve tiah ruat in Norway zongah Chin Relief Committee Norway (CRCN) cu, August 15, 2015 ah dirh asi cang.

Meeting cu Norway ram huap Chinmi buu aiawh in upa 12 an kai kho i, zinglei 11:00 in 14:00 tiang, Sandnes, Immanuel Baptist Church (IBC) ah an tuah.

«Tu bantukin kokek harnak caah Norway Chin mipi kan cawlcangh hi a voi 3nak asi cang; a voikhatnak cu Chin state ah Mautam kan ton lio ah asi i, a pahnihnak cu Kachin kan unau le hna nih fak piin harnak an rak ton lio kha asi, tutan hi avoi thumnak in ka thei.» tiah Meeting kai vemi le CCN advisor a ttuan liomi Pastor Pum Za Chin nih a chim. Cun a peh rih,

«Tutan cu voidang he ai dang, kan tonmi thil a faak, kanmah miphun chung a laifang bakah an kan tlung hnawhmi asi caah thazaang kan chuah deuh a herh ko.»

Norway Sianghleirun buu lei aiawh in a kai vemi ve tu kum in Political Science and Leadership in Master a tuahmi  Tial Kio Thang nih cun,

«Norway Chinmi ka um chung kum 10 ah keimah caah le hmuhnak ahcun tutan kan meeting hi abiapi bik le sullam angei bik meeting pakhat asi. Aruangcu, tu bantukin Norway huapin a dirmi Chinmi buu vialte kan i ton ka thei bal rih lo, cucaah kan meeting hi sullam a ngei hrim, ka lung zong tho, thazaang zong ka ngah ngai» ati.

Hi Committee hi minung 15 in sermi committee asi i, Norway ram ah ram huapin a dirmi Chin organisation; CCN, NCCF, NCCYF, CSUN le CNF upa pawl telh in dirhmi committee asi.

Committee nih ai tinhmi hna cu, meeting record ningin, a tanglei bantukin asi.

  • Chin state kokek harnak a tongmi hna bawmtu asi lai.
  • Kokek bawmhnak kongah Norway cozah, NGOs le buu dangdang hna he pehtlainak, biachimtu le fundtu asi lai.
  • Chin state ah harnak tongmi hna kong information khawmtu le thil sining Norway ah chim fiangtu asi lai.
  • Ram dangdang Chin Relief Committees le kokek bawmtu buu dangdang hna he pehtlaihnak le rianttuan ttinak a ngei lai.
  • Norway Chinmi le miphun dangdang sinah Chin state kokek ral kong fianternak le thawngthanhnak a tuah lai.
photo 2

CRCN dirh lio i a ra khomi upa hna (Photo: Mang Chum/CCN)

Meeting kai khomi chungin, committe rianttuan cawlcangh khawhnak caah, phaisa chuahnak zong an ngei. Meeting kaimi minung 11 nih Norway kroner 5500 Kr an chuah i Committee rianttuannak caah hman asi lai tiah thawng theih asi.

Pu Sang Cung Lian, CCN President nih,

« Meeting hmunhma an kan onhtu, IBC krihfa buu upa hna, abikin Chairman Pu Tin Ceu cungah siseh, Pastor Ceu Mang cungah siseh kan i lawm hringhran, anmah mipum hrim zong in meeting an rak kai khawh caah tthazaang a um khun, kan i lawm taktak, Pathian nih thlachuah pe ko hna seh», tiah lunglawmhnak a langhter.

CRCN rian hi thla 6 chung caan khiah asi i, a kalpitu dingah thimmi hna cu, a tanglei bantukin thim an si.

1. Chairman- Peter Sang Lian Thang [CCN Secretary, Mob +47 454 86016]
2. Vice Chairman- Rev. Peter Ngaidam [NCCF Chairman, Mob +47 400 37 857]
3. Secretary- Salai Cung Cem Bik [NCCYF Chairman, Mob: + 47 41851 562 ]
4. Assistant Secretary- Hlawn Tin Iang [NCSU Secretary, Mob: + 47 93880138]
5. Treasurer- Sang Cung Lian  [CCN President, Mob: +47 902 68 397]

Chin Relief Committee Norway (CRCN) Facebook Page.

https://www.facebook.com/ChinReliefCommittee

Categories: