All Chin Society Yangon (ACSY) President Peter Ngun Za Cung cu Europe ah a rian kong he pehtlainak a rak tlawn lio asi i, Germany, Denmark a luh pah hnuah, Norway zongah April 30 ah a rak phan. May 3 (Ningani) suimilam 17:00-18:00 tiang Chin Community in Norway (CCN) le Norway Chin Christian Federation (NCCF) upa hna he tonnak zong Stavanger Chin Church ah a ngei kho.
Norway a um chung, May 1 ah Egersund Chin Organisation (ECO), May 2 ah Chin Community in Sandnes (CCS) le Stavanger Chin Organisation (SCO) he May 3 ah siseh, lenkainak le biachim-ruahnak a ngei kho fawn. Rogaland chung Chin church asimi; Stavanger Chin Church le Immanuel Baptist Church (IBC) hna sin zongah phung a chim lai tiah theih asi.
CCN le NCCF upa hna he tonnak ah a biapibikin ceihmi hna cu, Norway Chinmi hna zong nih lungrual tein ttanti i, tulio ACSY nih a ttuan cuahmahmi Yangon ah Chin miphun vialte hrawm khawhmi inn nganpi saknak caah a dihmi phaisa cu Norway Chin Church kip nih an si khawh tawk cio in thawh le kuat khawhnak dingin rianttuan ttinak hnatlak biachahnak tuah kha asi.
“Europe khuasa kan miphun hna nih a tlawmbik sing 1000 (Million 100 kyats) tal nan chuah khawh ding hi kan saduhthah asi. Church ngan deuh nih sing 70 le a hme deuh nih sing 50 tal nan chuah khawh ahcun, kan i timhmi tlam a tling ko lai”, tiah ACSY president Peter Ngun Za Cung nih a chim.
Naite ah an dawmh cangmi inn saknak ah azapi in a dih dingah tuakmi cu, sing 3000 (million 300 kyats) asi. Yangon cozah nih peekmi Acre 4 tluk hmunhma ah sak dingmi hna cu; Chin miphun ttheng pawl vialte min cio in sakding inn tlar pakhat, minung thawng 10 leng ai tlum dingmi hall nganpi pakhat, Chinram leiin mizaw sifak pawl tlun khawhnak innpi pakhat le ramdang company pawl he ttuanti in sak ding hotel hna an si.
“Project zapite in a dih te dingmi hi cu, USD million 150-200 hrawng a phan ding khi asi. Kan miphun sinin chuak kho seh kan timi cu sing 3000 te hi asi ko, tu September thla ahkhin, Yangon ah fundraising event nganpi pakhat tuah kan tim mah tikah cun, sing tong 40- 50 hrawng hi a chuak lai tiah kan i tinhmi asi”, tiah Peter Cung nih cun a chim chap.
“Tu lio ACSY nih a kalpi cuahmahmi inn saknak project hi kan miphun nih kan i otmi project ahcun a nganbik, Mega Project asi ko lai. Zeicaah tiah cun, USD million 150 hrawng project hi Surbung Airport, Tikir Dam project te pawl naakin a let tampi in ngan deuhmi project asi. Cucaah ningcang tein ttuan zia thiam hau, pehzulh khawhnak lam le sial zong fiang tein kalpi khawh a hau te lai” tiah CCN President Peter Sang Lian Thang zong nih a chim ve.