Norway ah na nupi pasal nih an nin auh siloah an ruangah a rak phanmi na si i, na nupi pasal nih tukvelh-thlanglamhnak na ton ah cun, ramchung umnaknawl ka sung lai ti phan ruangah i benh peng a hau ti lo tiah UDI nih thawngthanhnak a rak tuahnak a sau cang. Aruangcu, na tuarmi hremnak ruangah nangmah tein ram chungumnak nawl sok khawh asi i umnak nawl zong peek khawh asi caah asi.
Nowray ram khuasa ramdang mi hna an si zongah anmah ram minung kokek hna zong nih, anmah duh tein an auhmi hna an nupi pasal le hna cungah tukvuak-thlanglamh a tam ruangah le cozah ttuanvo ngeitu zungah a phanmi kheis a tam cang ruangah hi bantuk in upadi thar chuah in zapi thei lawlaw in thawngthanhnak an tuah hi asi.
Sok duhmi hna nih an tuah ding cu, palik sin ah a ruang chimphuangnak le soknak ca apnaak an tuah hma sa lai, cuhnuah palik nih biahalnak an tuah hna lai. Palik nih umnaknawl peeknak kong ah asangbik ttuanvo ngeitu UDI sin ah an kong a kuat piak hna lai. Tu bantuk a tuarmi hna nih ramchung umnak an sok tik ah phaisa liam a hau lo.
Hi kong he pehtlai in tahfung an sermi pakhat cu, ram chung umnak nawl hmuhkhawhnak caah cun, tukvuak-thlanglamhnak a tuarmi ruangah minung man a zawrte/tlaak ter deuh timi kha fiang tein hmuhpiak khawh a hau.
Inn chungkhar ah tukvuaknak zei huaha tuar lo nain, ram chung umnak mah tein hmuh duh ruang ah asi lomi biachimmi zong an um khawh caah, thilsining kongah zohhlattu minung tha tein thim an si i, biahalnak ttha tein tuah asi. Cu hlathlainak nih a tanglei bantuk in hmuh asi ah cun umnak nawl sok zong ah hmuh khawh asi fawn lo.
– Ram chung umnak nawl a rak ngeimi na si lo ah cun silole phunglam ning loin a ummi na si ah cun.
– Tahfung tling in tukvuaknak a um taktak lo ah cun
Acunglei bantuk in hmuh asi ah cun umnak sok zongah san a tlai lo.
Tukvuak ruangah siloin a dang ruang ah sok duh ah cun?
Nupi pasal le he sik-vuak ruangah si loin a dang ruangah i tthen ah teh zeidah a chuak kho?
I duhlo ruangah, inn chungkhar nuamhlo ruang ah le a dangdang lunghmuhthiamlonak tibantuk ruangah nupi pasal he tthen asi i Norway ram umnak sok na duh ah cun a tanglei hna ruangah sok khawh asi ve.
– Fa a ngeimi nih an fa ruangah sok khawh asi i
– An ram ah kir ah cun harsatnak ka tong kho timi ruang zongah umnak nawl sok khawh asi fawn.
Source: