Rakhine ramkulh Tantwe peng Kyaihdaw khuami nih an dinmi tikhur chungah thihsii an peih kong thawng kan theih. Atu bantukin tikhur chung i thihsii an peih ruangah tikhur chungah a ummi nga an thi hna tiah cu khuami a simi Ko Kyi Than nih a chim.
Tikhur chung i thihsii a peihmi hna hi muslim tlangval (Mino) pahnih an si tiah amah nih cun a puh hna. “Sii an peih lio cu kan mit in kan hmu hna lo nain, Tanhtwe muslim tlangval pahnih hna cu pung he thiltom he tikhur leiin an rak tlun kha kan hmuh hna caah anmah tuahsernak, anmah nih an peih tiah kan chim khawh, chim khawh a si” tiah Ko Kyi Than nih cun a chim.
Mah sii a peihmi minung pahnih an kal hnuah tikhur cu kan va zoh i tikhur chung nga hna cu an rak thi hna tiah amah nih cun a chim. Atu i thil a cangmi kong he pehtlaiin palik sinah thawngthanh le chimphuannak (report) cu an tuah lo nain khuami itonnak le i ceihhmainak tu cu an ngei tiah theih a si. Kyaihdaw khua cu Tantwe in khaan (mile) 10 renglo hrawng a hla i, inn (600) hrawng a ummi khua saupi a si.
9.06.2012 ni zongah khan Maungdaw khuami nih an dinmi tikhur chungah thihsii peih dingin timtuahnak a ngeimi hna cu humhimnak lei ṭuanvo a lami ralkap nih an kham khawh hna tiah theih a si.
Mah hi thil a cangmi ah hin tikhur a hngakmi U Saw Shwe Maung cu ralhrang pawl nih an thah tiah theih a si. (Ch: Narinjara news)
Dinnak kha a cat lomi tiva bantukin luanter camcin ko u (Amos 5:24).