SSP Report 2011: Burma le Kongo Mi Rian Kongah An Min A Tha

Norway um ramdang mi hna cawlcanghnak kong kumtin report an chuahmi SSP (Statistisk sentralbyrå) nih kum 2011 caah a chuahmi ah Burma le Kongo mi pawl rian kongah ‘top’ an si tiah a ttial. Kum 2009 chungah mithar mi hna caah tuahmi Introduction Program a kaimi minung 10, 000 an si. Hi program hi  kum 2 asimi caah mi tamdeuh cu 2011 ah an dih.  Adihmi chung in mizeidah Program nih ai timhmi ning tein;  sianginn a peh kho i, mizeidah rian a hmu i mah tein a cawlcangh khomi an si ti  kha – hlathlaimi phun tampi lak ah- an tuahmi asi.

Hlatleimi hna ram dangdang mi hna lakah Burma in a rami le Kongo in a rami hna nih pakhatnak an laak. A kaimi chungin 70% hrawng hi rian/sianginn an peh kho ti asi. Burma in a rami hna hi a luancia kum hna zong ah a result a ttha tiah report nih a ttial chih.  Somalia le Palestine pawl nih hnu an khar.  Report zapi huap in zohah cun, introduction program a kaimi 55% nih sianginn/rian program adih in an pehkhawh ti hmuh khawh asi. Burma in a rami le Intro program kaimi hna zoh tikah, minung 332 an si, cu chungah cun nu le pa hi an i zat nawn.

Kommune hna lak ah rian a tlai tuanmi le sianginn a peh khomi hna lakah, Bærum (90%), Stavanger le Harstad ( 60%) hna an si.  Rian hmumi cazin zoh tikah kommune ngan deuh le fa deuh zong ai lo ve hna lo. Bianaah Kommune fadeuh ah nu hi pa nak in rian an hmu deuh ti asi. Nain an rianttuanbikmi /hmuhbikmi hi minung zohkhenh (omsorg) le inn thianh deuh lawngte asi ti asi.

Burma in a rami tamdeuh cu Chin le Karen deuh an si hna. Tu bantuk in top list ah kum tin ti awk in kan i tel ve lengmang tikah hmailei lak tthan lengmang zong an i harh lonak asi. Kum 7-8 chung peh tein lakmi refugees group hi Norway tuanbiaah Burma mi lawng nan si tiah an kan ti tawn. Aruang tampi lak ah rianttuan mi sianginn kaimi kan tam caah asi ve ti theihter pah in thawngpang ttha kan hun ttial.

SSP Full report relduhmi caah

 

Scroll to Top