Poland president, anupi le an hnuzul minung dang 95 hna cu, Warsaw le Smolensk karlak vanlawng an i cih lioah an vanlawng a tla i an zapi tein an thi. Hi thawngpang nih tulio cu vawleicung a hninh dih lio te asi. Poland tuanbia ah hi bantuk kan tong bal lo tiah, Poland prime minister Donald Tusk nih a chim.
President Lech Kaczynski le a mithila hna cu,voihnihnak vawleicung ralpi lio ah Russia nih poland ralbawi pawl an rak thahnak hna hmun ah an kal lio ah hi bantuk in an zapi tein an ciamh dih hi a si. Smolensk vanlawng kawrawn tum an timh hi chum a zaam ngai i, vawlei tha tein hmuh khawh asi lo ti asi, cupinah , thlilei ralkap lutlai pawl zong nih hmundang vanlawng kawrawn ah tum ko uh tiah warning zong an peek ko hna, nain president vanlawng mawng nih a duh lo i, khua a fian lo buu in a tum chihmi asi tiah an ti.
President Lech Kaczynski hi communist uknak/zumhning raltha tein a rak dotu a si caah, nitlak lei ram upa pawl nih an upat ngaimi le an tihzah ngaimi asi. Tu a thih zong ah ngaihchiatnak cakuat/bia in an langhter mi tete nih an rak an tanpi ngaimi asi nak a langhter ngai.
Poland ram cu, presidential hruainak asi lo caah, mitampi ruah ning bantuk in kan ram i hruainak kong ah a buaibai tuk lem lo, thazang cu kan der deuh ngai nain, a tlangpi cun khahlan kal ding tein kan i hruainak a thlurpi cu akal peng ko lai tiah Prime minister nih a chim. Poland minung pawl cu an ngaihchiat lawng siloin, an lung hrim a dongh kho tuk, hmailei ah zeitindah hi zat hruaitu an thih cu kan i hliphlau khawh lai tiah an mitthli he an chim len.
Vanlawng cung ai telmi a thimi dang, ramchung biapi a si mi hna cu: Tiralkap lutlai, thli/tlang ralkap lutlai hna, ramchung cozah bank lutlai, ramdang lei vuanci changtu (deputy foreign minister), ramchung himnak lei kong tlai lubik, Parliament biachim tu lubik chang, olympic committee ah lutlai, upadi lei thiamsang minung a tlawmbik pa 3 le president bawmtu mifim pawl hna an si tiah ramdang lei vuanci nih a chim.
An vanlawng cihmi cu Tu-154 phun a si i, a luancia kum 40 chung ah a voi 66 hrawng a rawkbal cang tiah Aviation Safety Network nih an chim. Vanlawng thalo ngai phunkhat asi, a thawn zong a thang tuk le vanlawng si a dih tuk caah, hman ti lo ding in Russian carrier Aeroflot nih a rak withdraw cangmi a si tiah detnews.com nih cun a tial.
Kaczynski cu kum 60 asi cang i cozah he a ralchanmi buu lei lubik , Jaroslaw Kaczynski he chuakkhat faphir an si. Anupi , Maria, cu sipuazi thiamsang minung pakhat asi ve. Fanu pakhat te an ngei, amin ah Marta a si i Marte nih angeihmi hna tunu pahnih an ngei.