Oslo Khua American Palai Zung Pawngah Bom An Hmuh

Oslo (Norway):    Norway ram Oslo khua ah hram a bunhmi American palai zung pawngah a dirmi mawṭaw pakhat tang ah lunghrinhmi thiltom (Bomb) pakhat cu humhimnak lei ṭuanvo ngeitu hna nih an hmuh hnuah palai zung rianṭuantu (vuanṭhan) pawl hna cu an nunnak an humhim khawh nakding caah hmun dangah an ṭhial hna kong Norway NTV thawngthanhnak nih 01.08.2012 ni ah an langhter.


Bom a kawlhawltu ralkap hna le uico hna cu, bom an hmuhnak hmun ah an thlah hna kong, American palai zung pawngkam hrawnghraang ah a ummi mizaapi hna cu an umnak inn in hmun dangah an ṭhial hna kong Norway palik nih an chim.
American palai zung ah humhimnak lei ṭuanvo ngeitu hna nih palik sinah 31.07.2012 ni chun suimilam (11:22) am ah phone in  thawngthanhnak an tuah hnuah palai zung a pawngkam (500)m hrawng a kaumi hmun cu palik pawl nih bom kawlhawlnak le thianhhlimhnak an tuah kong palik lei in chimnak nawlngei Martin Totnam nih a chim.
Siangpahrang inn le a miṭhi a lalaang inn ah a rak lengkaimi pawl hna zong an nunnak an him khawh nakding caah an umnak in hmun dangah an ṭhial hna tiah thawng kan theih. (Ch: Kyaymon)

Scroll to Top