Europe ram hna lakah, Norway le Denmark hi nupi/va auhnak kong ah a haarbik asi tiah, nihin chuakmi Norway tadinca Aftenposten nih a tial. Norway ah 2009 kum ah nupi va caah umnaknawl asokmi minung 11, 168 an si i, cu hna lakah 198 nih umnak nawl hmuh lo in an reject hna ti asi. Hi reject mi hna lakah 115 hi pa an si tiah an tial. Tukum 2010 tutiang ah reject cangmi hi 158 an si cang tiah an tial chih.
Norway holh in ” Proformaekteskap ” tiah an auh i, asullam cu, ramchung umnak nawl hmuh duh ruangah nuleva kan si tiah sokmi hna kha a chimduhmi asi. Norway phanh hlan ah cun, ka va ka nupi ruangah ka ra tiah an i ti riangmang i, umnak nawl an ngeih cangka in, thennak an sok colh ti asi, silole aruang dangdang an kawl i, a dang tein umnak lam an kawl colh tawn. Cucaah UDI (Norwegian Immigration) nih hitluk in zulhding phung a renghnak asi. Hi nuleva kong ah cozah a hlengmi hna lak ah a tambik hi, Asia ram an si bik; China, Vietnam, Sri Lanka le Russia timi pawl an si ti asi.
Norway phan Chinmi hna zong, kan rak phanhhlan ah cun, nuleva si ding in tha tein kan rak phan tawn ko hna, nain kan phanh hnu ah lung i theihthiam lonak ruangah maw, pakhat le pakhat i duhnak ser khawh lo ruangah maw, zudin ruangah chungkhar buaibainak kong ah maw, fale zohkhenhnak kong ah maw tiin a ruang phunphun ruangah, a dangdang umnak (Separation) silole thennak taktak (Divorce) tiang kan phan tawn ve hna. Tu tiang Chinmi Norway ummi 1500 cung fai te hmanh ah kan case a tlawm ti lo tiah ti khawh asi. Cucaah kanmah kong ruah zong ah thinphang pah cu kan si cang.