Norway Senri Magazine tawlreltu hna nih an tuahmi seminar pakhat cu upa minung 20 tel in le hlunghlai ngaiin, June 29, 2013, Froland khua ah kan tuah khawh tiah, tawlreltu chungtel asimi Pu Thawng Uk nih thawngthanhnak a tuah mi, ‘Norway Biathang’ ah a ttial.
Tubantuk seminar hi Norway ram huap in tuahmi ah a voikhatnak asi i, seminar nih timhtuahmi cu, Laica kilvennak le nunphung thlau lonak timi asi tiin theih asi. Seminar ah cathluan pahnih an chuahpi; apakhatnak ah Salai Lian Biak Hu nih, “Zeitindah Europe ramah Laica kan kilven lai?” timi le Pu Thawng Uk nih ” Nunphung pahnih karlak ah” timi an si hna.
Senri Christmas cabuai (Senri Julebord) zong tuah tawn asi i, tukum cu Norway Chinmi tambikah Stavanger ah tuah asi lai tiah thawng an thanh. Hi kong he pehtlai in “Norway Biathang” ah hi tihin thawngthanh asi.
“Hihi Senri phu nih Norway nun kan i cawn bakmi a si. Tukum Senri Julebord cu Stavanger ah kan tuah lai i, Julebord lawng si loin “Senri Concert” a um chih lai. Cu Concert ah Mirang hla, Norway hla, Kawlhla kan letkhaan te lai lo. Laihla lawnglawng kan letkhaan te lai. Norway ram chung Lai nungak tlangval vialte sawm dih nan si. Hlasak a huammi paoh sak khawh dih a si fawn lai. Luh man a um lai lo. Man lo a si lai.”
Senri Magazine hi Norway um Chinmi Laica le Laiholh a tlaihchanmi hna nih an thawkmi le tawlrelmi asi i, tukum in magazine a voi 3nak an chuah asi cang. An kong tamdeuh theih duh ahcun, an website: www.senrimagazine.com ah rel khawh asi.