Dear careltu,
Nan dihlak dam in nan um cio hna maw? Kan Lai (Chin) miphun chungah sifahnak a tluntertu, kan miphun ningpi in thah a kan timtu, kan Chin miphun min a chiattertu le nifatin tein rawhralnak le thihnak lam leiah a kan hruaitu kan ral ngan bikmi cu “Zuu” a si. Lai (Chin) miphun kan dihlak nih kan umnak hmun cioin doh le tei khawh rak i zuam cio hna usih.
Nunnak ah a ttha lo bikmi cu nunnak zeirello hi a si. Zuu kan din lengmang mi cu kan nunnak zei i kan rel lo bia a si ko. Na nunnak hi na sunhsak maw? Na sunsak ahcun na caan hna kha a sawhsawh le zuu din sa einak menmen in hlolak hlah. Kan caan hna hi minung kan nunnak a kan sersiamtu an si. Atu ah kan miphun chungah pakhat le pakhat a kan sikvuaktertu, pakhat le pakhat a kan dohtertu le kan miphun chungah thil thalo a chuahtertu le kan miphun a sifahtertu rungrul cu zuu a si. Pakhat le pakhat kan i doh awk a si lo, lungrual te le lungkhat tein thil thalo tu kha kan doh awk a si. Vok khi zoh hna ulaw nawncek, cerhcet a duhmi le nawncek lakah aa nuam pengmi an si i thianghlim tein um an duh lo. Kannih Lai (Chin) miphun zong hi zuu din sa ei i kan i nuamh tuk ahcun vok bantuk kan si tinak a si. Cucaah cun kannih cu vok kan si lo caah zuu din le sual tuahnak ah i nuam hna hlah usih. Tuu khi zeitikhmanhah thianhlim tein um a duh pengmi saram phun an si i, nawncek a huami phun an si. Kannih Lai (Chin) miphun hna zong nih zuu din sa ei le sualnak hna kha a hua i Tuu bantukin thianghlim tein le nunnak thiangin nun i zuam hna usih. Kannih Chin miphun cu zuu dindan kan thiam fawn ttung lo i kanmah nih zuu kha tei loin zuu tu kan i teiter caah zuu kan din chung paoh cu miphun dang nih an kan nihsawh peng ko lai. “Zuu hi nihsawhnak mi a phorhtu a si, ritnak zuu hi i siknak a si, zuu rit cu hruh a si”.(Phungthlukbia 20:1) Kawl miphun nih “Chin miphun le zuu” tiah an kan ti cang. Hi hrimhrim hi i fahsak tuk ding a si.
Ahodah chimpit vansang in a um tawn? Ahodah a ngaih a chia tawn? Ahodah mi he aa si tawn? Ahodah bia a ngei tawn? Ahodah zeiruang lo ah hma a ing tawn? Ahodah mit sen remrum in a um tawn? Zuu a camhmi, rim thar he cawhmi zureu a hneksak lengmangmi kha an si.(Phungthlukbia 23:29-30) Hrai chungah sen kirker tein a um i tleu dildel tein a lang i vun dolh ah nal ngaiin lanh dawh a simi zu khi va zoh hlah. A donghnak ah cun rul bantukin mi a cu i pinger sivai bantukin mi a henh.(Phungthlukbia 23:31-32)
Kan miphun chungah sifah harsatnak a tluntertu rungrul (zuu) hi kan umnak hmun cioin doh le tei khawh rak i zuam cio hna usih. Atu cu a tanglei i “Sifahtertu rungrul” timi hla ngai cio dingin kan sawm hna…,
http://www.youtube.com/watch?v=mLu1Ecs5hrE
Dinnak kha a cat lomi tiva bantukin luanter camcin ko u.(Amos 5:24)
Upatnak he,
Biak Lian Thawng (Svolvær)