Chin mi kan tuanbia zoh tikah Khrihfa kan sinak nih a kan thanchopi ti cu fiang tein a lang. Phundang cun, kan biaknak nih a kan thanchopi. Chin ram ah 95% cu Khrihfa biaknak kan si ticu zapi nih zumh le cohlan asi. Cunih a langh termi cu, Biaknak ah kan i funtom kho bik i kan lung aa rual biknak cu biaknak nih a hrihhruai mi cawlcanghnak ah hin asi. Asinain, Chinmi kan i tthenttek dihnak le kan i dohkalh dihnak a hrihhram kan zoh sicun; Khrihfa kan sinak, kan biaknak ruang thiamthiam ah asi. Cucu zei ruangah dah asibik ti hi kan zoh tthan asi cun, Biaknak ah zalonnak le zalonning kan thiam lo caah asi. Phundangdeuh cun, Biaknak zalonnak kan hmanning ah dawtnak, tthatnak le inkhawhnak kan ngeih lo caah kan i then dih le kan i dohkalh dihnak hi asi.
Ralkap uknak chan nih caan saupi kan biaknak a rak hrem – ther le phang in biaknak lei hruaitu hna an rak um zungzal. Cu nih a hun zulh vemi thatnak cu; Biaknak ah kan lung aa rual i kan thawng. Evangelist le mission rianttuantu hna tampi cu ralkap uknaknih an rak hrem hna, thawngttha chim le karhter ngam loin tlerh le khonh an rak si. Cu tikah, kalning aa khat mi le hruaining aa khat mi biaknak ah hmunkhat teah tonpumhnak le lungrualnak kan rak ngei. Biaknak thencheu le bukuai tepawl cu lungthin hmanhah arak chuak kho lo hlei ah caan sining zongnih a rak kan pe lo. Sihmanhsehlaw, zalonnak tlawmpalte a hun um deuh le cangka biaknak lei i cawnpiaknak ah zalonnak a hun chuahpi ve. Zalong tein thawngtha chim le tlunkal khawh a hung sideuh tikah, Pathian bia phuangtu deu le tak/dik in kan hung um – Khrih thawngtha cawnpiaknak ah zalonnak kha thenteknak le i cheunak aa tel lo, a maru zong asi lo.
DAWTNAK: Zatlang in kan nunnak ah dawtnak ngeih hi a biapi tuk. Dawtnak kan ngeih lo ahcun caan sau rian kan tuan tti kho lo. Dawtnak kan aupi i kan i dawt lo ahcun dawtnak taktak a si lo. Nihin zongah dawtnak taktak a si lo mi cawnpiaknak ruangah kan i tthen lengmang. Cathiang nih dawtnak cu thlachiat a ruat i mi cungah zaangfahnak a ngei, dawtnak cu a nah a chuak lo, a lung a puam lo i aa porhlaw lo a ti. Dawtnak cu minung vialte caah sullam tampi a ngeimi a si. Dawtnak hi Cathiang nih a sullam phun nga in a kan tthen piak. Cu hna cu; thlachiat ruah, zaangfahnak ngeih, nahchuahnak ngeih lo, lungpuam lo, porhlawtnak ngeih lo hna hi an si.
Dawtnak cu zaangfahnak a ngei. A sullam cu mi vialte cungah thatnak ngeih khi a si. Mi vialte cungah thatnak le zaangfahnak ngeih hi dawtnak a si ve. A nih deuh, a mah deuh ti loin aa tluk ten zawnruahnak ngeih khi midang zaangfahnak ngeih cu a si. Cun dawtnak cu a nah a chuak lo. Nahchuahnak rak ngeih te hna hi dawtnak rak ngeih lo a rak si. Nahchuahnak kan ngeih tikah mi nih an ngeihmi thil ngeih duhnak khi a si. Cun kanmah nih kan ngeihmi hi midang nih ngeih kho hna hlah seh ti duhnak ngeih zong khi a si. Dawtnak cu a lung a puam ballo. Amah le amah aa faak lo, tangdor nun a ngei.
Khrihfa kan si nak hi dawtnak nih fiangten lam a kan hruai i a kan hmuhsak ding kha a si. Dawtnak cu thlachiat a ruat tiah Bible nih fiang tein a kan cawnpiak. Thlachiat ruah cu tuah le chim kan duh cukmak ko mi hrial le mi kianh khi a si. Thlachiat ah hin lungsau zong aa tel. Mi nih kan cungah thil thalo an tuah tikah lehrulh awk a si ko mi, leh lo tein um le lungsaunak ngeih hi a chim duhmi cu a si. Hi bantuk lungsaunak nih hin dernak le sunghnak si loin teinak le tthawnnak tu hi an chuah a kan pek tawn.
Dawtnak cu aa porhlaw lo. Khrihfa bu ah porhlawtnak a um ahcun kan tuahkhawh mi kan hmai kan i hngal pi caah duh poh in mah thatnak hoi in bia kan chim tawn. Ka tuahmi ruang a si tiin kan tuahmi cawisan kanmah tein kan i zuam tawn. Midang nih a thiam bik ka ti hna seh ti kan duh caah midang santlaihnak pakhat hmanh ngeih ter kan duh tilo. Mah cucu dawtnak ngeih a si lo.
Dawtnak in riantuan le thiltuah lawng si loin bia zong kan chim ding a si. Biaknak i kan zalonnak pakhat cu dawtnak hi a si. Khrihfa bu chungah hin dawtnak hi kan kaa in kan chim tawn nain dawtnak taktak hi a tlawm tuk tawn caah buainak le pakhat le pakhat rem lonak zong a chuahpi tawn. Dawtnak kan ngeih ko ahcun Khrihfa bu a him i, nun a nuam.
THATNAK: Thatnak ti cu thil pakhat kha hmunkhat te ah um ter kha a si. Caan tampi cu kan tuahmi hi thatnak a si lo caah kan i tthen tawn. Tahchunhnak ah Norway ah hin Bu tam deuh cu mah le Khrihfa Bu cio in Crusade le Camping caah cawnpiaktu hi auh le cah an si tawn. Ramkip thawngtha chimthiam Kawlram in siseh, kanmah Europe in siseh, Asia le USA in siseh mi tampi kan cah tawn hna i, an kan cawnpiak tawn. An kan cawnpiak tik ah anmah duh mi cio deuh in an kan cawnpiak tawn i annih Khrihfa Bu hi mi zei dah an si, zeitin an umning ti zohpiak ti loin mah siaremnak in cawnpiak hnu ah kal tak kan si tawn. Pakhat a rat tikah a tha tuk kan ti, a dang pakhat a ra than i, a tha tuk kan ti tthiamtthiam. An kan cawnpiak mi hi mipi nih a lakzia kan thiam lo ahcun kanmah tthennak le buainak tiang a chuah pi khawh. A thencheu zia kan thiam ahcun thatnak tampi a chuahpi lai i kan thangcho ko lai. Biaknak ah karhlan kan thiam lai i zalong tein kan Khrihfabu cio ah Pathian kan thangthat tti kho ko lai.
INKHAWHNAK : Inkhawhnak cu mi nih kan cungah an tuahmi a dik lo zong ah midang in khi a si. A hmaanmi a si lawnglawng midang kan in hna ahcun mah cucu inkhawhnak a si hnga lo. Kan tihzahmi hna cung lawngah inkhawhnak kan ngeih ahcun cu zong cu inkhawhnak a si lo.
Inkhawhnak kan ngeihnak hnga hawikom sin ah lungsau a hau. Khrihfa bu zongah lungsau a hau. Kan lungsau ahcun rian kan tuan kho i, kan tthangcho fawn. Mi kan in khawh lo ahcun siknak a chuak tawn. Siknak cu a tha mi thil a si lo. Kan thinhun tikah kan tuah awk a si lomi zong kan tuah i, midang an lungfak tawn. Midang lungfah ter cu mi kan in khawh lo caah a si. Inkhawhnak um lo cun huatnak le dohnak tiang a chuak kho. Mah cah cun Khrihfa bu ah lungsaunak he inkhawhnak a um a hau. Khrihfa bu daih kan duh ko nain inkhawhnak ngeih kan duh lo ahcun dawtnak a um kho lai lo. Pathian mithmai zoh bu tein lungsau tein rian kan tuah ahcun kan Khrihfa bu le kan riantuannak lam a tluang lai i, kan thangcho ko lai.
Dawtnak le thatnak le inkhawhnak cu thluachuah hmuhnak lam an si. Dawtnak tel lo cun kan i thenthek. Thatnak tuah lo cun kan thangcho kho lo. Inkhawhnak kan ngeih lo ahcun huatnak a um leng tawn. Cucaah dawtnak le thatnak le inkhawhnak he nuncaan hman hi kan zapi te nih kan herh dih. Mah pawl cu Biaknak zalonnak muru an si caah a hopoh nih kan herh mi an si.
(Webmaster’s note: “Norway Chin Celhzuamnak 2016” ah tuahmi capaar ttial zuamnak ah ai tel vemi Sui Cer Chin nih a ttialmi asi)