“Biaknak Ithlen Kong Bill” Na Duhlonak Langhter Ve

safe_image

Kawlram cozah biaknak lei vuanci zung nih “Biaknak Ithlen Kong Bill” (Religious Conversion Bill/Anti-conversion Bill) a hran an suaimi cu an lim cang i, mipi sinah ruahnak/hmuhning chuah kho cio dingin chiahpiak kan si cang!

Kan Chinmi cheukhat nih “Sehtan Bill” ti tiang in a min an bunh i hechet tiah, mipi nih duhlonak langhter cio dingin thazaang peek le forhfialnak tuah asi. Minthut ttanlaaknak (Signature campaign)  le online petition hna zong an tuah i, minung a thong nih min zong an hun tthuh ciomi hmuh khawh asi cang.

Hi Bill hi phungki pawl nih an hruaimi Miphun, Biaknak le Zumhnak Kilvengtu Buu nih an chuahpimi ruahnak cungah cozah leiin hmalaknak/lehnak an hun tuahmi asi. Hi buu nih a dang bill pa 3 zong an chuahpi rih, tthihumnak, milu controlnak le nupi tampi ngeih khapnak bill pawl an si. Hi bill vialte hi tuthla dih hlan ah President Thein Sein sin phanh ter dih dingin timhtuahnak ngeih asi.

Minung covo lei rian a ttuanmi buu tampi le Civil Society 80 renglo nih – CHRO, Human Right Watch tibantuk- hna nih cun, hi Bill hi minung covo phung hna he ai kalh caah a herh lomi bill asi tiah an au ve.

Hi Bill hi mipi ruahnak an hal hnuah parliament a phan te lai, cu tikah MP pawl nih an ceih lai i, a ttha ko an ti ahcun, laws ah ai cang te ding khi asi. Cucaah mipi lei in kan duhnak kan langhter khawh cio ding asi ve.

Atanglei ah duhlonak langhter khawhnak petition kan rak taar i, ttan laak in rak i tel cio ve hna usih tiah kan nin nawl hna.

BIAKNAK THLEN KHAMTU BILL DUHLONAK LANGHTERNAK 

Bill nih a chimmi cheukhat:

–       Biaknak i thlen duh ahcun kum 18 cung si a herh, amah lungtho/duh tein ai thlengmi asi fawn lai.

–       Biaknak kai thleng a timi nih a biaknak thar kha a zum taktak maw timi hlathlainak/biahalnak a um lai.

–       Mi pakhat kha biaknak ithleng dingin, hnahnawhnak, ningcang loin zuamhteihnak hmang in a naam chih lai lo.

–       Mi pakhat abiaknak ai thlen duh ahcun kham asi lai lo, hnahnawhnak pek khawh asi lai lo.

–       Phung pawl a buarmi cu, kum 2 tiang thong thlak khawh asi (or) phaisa ting 2 tiang cawiliam ter khawh asi.

Scroll to Top