A Voi (69) Nak Chin Miphun Ni Sawmnak (Rogaland)

Chin Miphun a dawtu Norway khuasa Chinmi vialte hna nan dihlak CND Committee 2017 Rogaland nih nan kut kan in tlaih hna. Dam le lawm in nan um cio hna lai tiah ruahchannak kan ngei. Chin Miphun Ni zong kan von naih thluahmah bantukin lungthin zong aa hon i hlau ziahmah. Zarhthum te taktak lawng aa duh cang. Maivan chung tlonlennak kip ah ram hla aw a hon thang ziahmah. Ram dawtnak lungthin he capar ttha ttha nih a hon kan don thliahmah. Lungthin zong aa hlerhlau chialmal. Kan Miphun Ni phak lai zong kan i ngaih tuk cio. Tukum zong kum dang bantukin nuam le sunglawi tein kan hmang tthan hna lai tiah a hmasa bik ah nan dihlak kan hon in sawm hna.

Tuahnak hmun Address
A voi (69) Nak Chin Miphun Ni cu Rogaland Chin mi caah Egersund ah tuah a si lai. A hmun cu Egersund Arena, Gamle Eigerøyveien 34, 4373 Egersund (2012 CND rak tuah cia nak) ah a si lai. Cu caah kaadang hmundang ummi Chinmi vialte zong CND 2017 kan zawh cio hram kho u tiah kan in sawm hna.

Lai laam le Fashion Show
Kan fale ngakchia le mino nih kan Chin thilthuam dawhdawh hmuhsaknak (Fashion Show) an kan ngeih piak lai. Ruakhua tlak le Lai laam zong mino pawl le kan fa le ngakchia pawl nih an mah le an duh thim cawn in an kan zuampiak cuahmah lio a si.

Capaar ttial zuamnak
Capar ttial zuamnak hi phu hnih tthen in zuamnak a um lai. Aa zuammi chung in pakhatnak, pahnihnak le pathumnak ti in thiam man laksawng phalh a si lai. Ngakchia (Kum 13) tang pawl kha carel zuamnak in a si lai i, upa (Kum 13-16) kar cu cafung in capaar tial zuamnak in a si lai. (Fiangtliang deuh in Pu Van Thang sin in update a hon kan tuah piak te lai).

Mileng
Tukum zong kumdang bantukin mileng zong a hlei in sawm an si. Egersund khuabawi (Ordfører), ralzaam tawlzarel (Egersund Flyktning Konsulent) le Rogaland penguk (Rogaland Fylkemann) hna an si lai. An lungduh cio biatawi chimnak zong an kan ngeih cio te lai.
Biaruahnak (Panel Discussion)
Bia ngaih nuam minung 3-5 phu biaruahnak (Panel Discussion) a um lai. A sau lai lo. Nihin kan chan hoih in tlangtaar ttha ttha an kan thim piak cang i, Hot Issue bak an si lai caah ngaih an um ko. An kan timhtuah piak cuahmah lio a si.

CND Concert
Concert nuam taktak a um lai. Lai tlang a ngaimi pawl caah ram hla tthattha i oih ding in zaithiam kan ngeihmi tampi hna nih timhtuahnak a kan ngeih piak cuahmah. Ringawn tumtu pawl zong an i ready pah lulhlalh cang. Note an lak cuahmah lio a si tiah thawng kan theih. (##Pangpar pek ding zuar a um lai lo).

Lai Paih (Chin Wrestling)
Pasal si i tthawn hi tuchan ahcun min a than ter. Cucaah kan Lai paih hlunghlai taktak in paih bual an kan serpiak lai. Paih tlangtlatu pawl zong thim an si cang. A herhmi vialte a tha bik in an kan zuam piak lai caah kan i ngaih tuk manh cio.

Tlangval pawl zong tukum cu Gym kal lulh cio a si caah “Lai pa“ tiin min aa chal kho tam dawh kan si caah, ho pa lal lai tuak le ruahdomh a har ngaingai cang.

Laksawng ah pakhat a teimi 100 kr pek a si lai. Tam bik tei mi nih 500 kr an co lai i, paih buanco (Bualco) nih 1500 kr an i ttin pi lai. A lenglei in tthawn le thiam man phalh a kan duhmi paohpaoh caah innka fak pi in (kau pi in) Committee nih an kan on piak. Tthawn hi a hlawk. Tlangval pawl zarhthum chung Gym kalnak le timhtuahnak caan nan ngei. Tlangval he patung he CND 2017 nih nan thazaang le nan thiamnak aan zuamcawh hna. Kan Lai paih sunhsaknak he paih bual chuah khawh i zuam cio hna usih !

Chuncaw
Chuncaw ah sabuti thaw taktak in Committee nih an kan chuan piak lai caah chuncaw kongah ka ttamhal sual lai tiah upa he ngakchia he phan awk a um lai lo. Amah belte a man in a si lai caah zalsanh tthin lo kan zuam piak cio te hram u. Sabuti a ei kho lomi caah Pølse & Brød hmui taktak in an kan tuahpiak chih lai. Mah zong cu a man tthiamtthiam a si lai. Cawk lo le ei lo in nan kirnak hnga lo lung reprai ngei bu tein nan rak kan umpiak nak hna lai bia beoh kan in duh cia hna.

Thok Caan
A caan kha zanlei kl 15:00 bak in thok a si lai caah a hohmanh tlai lo kan i zuam hna lai. A tlaimi hohmanh i hngah a um ti lai lo. International Time a si cang lai caah a hlankan deuh in phak khawh i zuam cio in kan in nawl hna.

CND Lives
Kan caan a hramthok in a dongh tiang hmundang le ramdang ummi nih kan CND an kan zawh khawhnak hnga Live in GBC Media, Stavanger nih an kan thlah piak lai. A thiammi lawng te an si caah kan i ngaih. Cucaah smart taktak in Lai thil kan ngeihmi cio in thumh ding in zaangfah sawm kan in duh hna.

A hlei in sawmnak le nawlnak
Rogaland Mino Phu nih lupawng ponh, thantar(flag) le ttang-tonh an kan zuarh te lai. Bawmh khawh kan rak zuam cio te hna lai. Cucaah pa nih Lai coat, Lai puan aih le nu nih kan lungduh cio mi Lai thil dawh taktak in hruk khawh i zuam cio dih ding in kan in sawm hna.

Nikum CND 2016 kan tuah ning zoh tikah a nuam i lung a dam taktak. Tukum zong thianghlim tein le zohdawh tein tthutdir i zuam cio ding in bia beoh kan in duh hna. Kan Miphun Ni a si bantuk in a hlankan in khonh lak khawh le chuah khawh i zuam cio hram hna usih.

Chin Miphun Ni cu kan Ni a si caah kanmah nih kan upat le kan hmaizah a hau. Kan Miphun mi ramdang ah tlau hlah usih tiah kan duh ahcun kan Miphun kan dawt a hau. Miphun a dawmi nih cun kan Chin Miphun Ni tal ahcun nidang nak in kan papek (usapek) deuh a hau. Cucaah kan zapi tling tein chuah khawh dih ding in kan i ruahchan ko.

Nuam taktak le sunglawi taktak in kan Miphun Ni hman tti ding in CND Committee, Rogaland nih kan in sawm hna.

CND 2017 Committee (Rogaland) aiawh in
Mang Bawi Lian
Ni Par Hlawnceu
Mary Tialku

Scroll to Top