2016 Norway Chin Celh Zuamnak Kong Thawngthanh (I)

05 April 2016

Norway khuaza um kan miphun vialte nan dam cio hna maw? Nan rianttuan, cacawn le khuasaktuntuk ah nan tlamtling cio theo lai tiah ruahchannak kan ngei. Ni le thla cu tleih awk ttha loin an kal cuahmah, caan a kal cuahmahmi ah kan duhmi zong kan ton i kan duh lomi thil zong nih a kan tlun hnawh.

Avoi 68 nak Chin Miphun Ni cu Norway khua zeimawzat ah dam tein kan rak tuah cio ti zong thawng kan rak rel, hmanthlak tete zong kan rak hmuh cio ve. Tawlreltu dihlak cungah le mah le ti khawh tawk cio in ai telmi nan dihlak cungah CCN min in lunglawmhnak roca kan ttial. Kan miphun caah caan, thazaang nan peekmi cu a lak asi hrim lai lo. Thlachuah tampi nan cungah a tlun lawng siloin, kan mipi zong nih cawnawktlak in lam nan kan hmuhsak caah kan i lawm tuk hringhran.

CND a dih zartkhat ah Norway Chinmi kan pa pakhat asimi Pu No Thawng nih vawleicung nunnak in a kan liam taak. Chinmi zapi kan ngeih a chia dih. Abikin Nowray Chinmi hna nih pumpak in siseh, krihfabu le buu dangdang vialte zong nih ngeihchiatnak langhter dih asi. CCN zong nih ngeihchiahnak a tharin kan hun langhter tthan. Pu No Thawng nih a pum kan kaltaak hmanhseh, rosung a kan chiah tami cu, a nunzia le miphun dawtnak a ngeihnak kha asi. Anun chung ai peekchanhnak vialte cu Norway Chinmi hna zong nih philh khawh asi ti lai lo

Kan ngeihchiat cuahmah lio piah thawngttha zong cu kan hun theih ve. Thawhtthan kan hman dih luklakah, kan ram ah kum 50 chungah a voikhatnak mipi nih thimmi cozah le President kan hun ngeih khawh lawng siloin, kan Chinmi chung zongin Burma national level uktu Vice President level tiang kan hun hmuh khawh ve. Kan caah biapimi thawngpang le thlennaak lawngte an si ko.

Thawngthanh le bawmhhal tthan kan in duh ko hna. Tutan cu, kan hnulei January 21 ah kan rak thanh cangmi kong he khan ai pehtlai. June 29 – July 2, 2016 tiang, Stavanger ah tuah ding Norway Chin Football Championship kongah asi.

2016 Norway Chin Football Championship (NCFC)

Tuanah tlawmpal kan rak thanh cang bantuk khan, tukum kan celh zuamnak cu Stavanger khua ah Budget 140, 000 kr dih in tuah dingin tawlreltu hna nih timhtuah cuahmah asi. Convener Nelson Lian Lung (Florence pa) tawlrelnak in upa te meeting zong voi hnih tuah asi cang, cawlcanghnak a phunphun ah ttuanvo lami upa hna zong nih mah le ttuanvo laakmi kongah tawlrel an thawh cang hna. Celh zuamnak ah a theih aherhmi a tlangpi thawngthanhnak cu CCN nih a tuah lai i, cawlcanghnak pakhat cio tawlreltu upa/hruaitu hna tu hna nih anmah tawlrelmi kong cio ah fiang deuh in thawng a kan thanh tthan te lai.

NCFC ah ai tel ding cawlcanghnak le tawlreltu hna;

1. Pumpalulh Celh (Football)

Tawlreltu ah Nelson Lian Ling le a hawi le Pu Van Za Uk (Hamar), Pu Ri Chum (Elverum), Val Ni Htun (Oslo Area), Chan Cung Hnin (Stavanger), Pu Hei Ling (Egersund), Vaal Lung Tum (Sandnes), Si Bawi Mang Lian (Agder Area) hna nih a kan tawlrel cuahmah lio asi. May 2016 dih hlanah Football team pakhat nih NCFC ngunkeng sinah luh man 1000 kr pek dih khawh i zuam hna usih.

Tutiang ah Football team a chuak kho dingah ruahmi hna cu; 1. Hamer area 2. Elverum area 3. Oslo area 4. Stavanger area 5. Egersund area 6. Sandnes area 7. Agder area.

2. Volleyball (nu & pa)

 Tawlreltu: Nelson Lian Ling

May 2016 dih hlanah Volleyball team pakhat nih NCFC ngunkeng sinah luh man 1000 kr pek dih khawh i zuam hna usih.

3. Norway Chin Miss & Talent show

Tawlreltu: San Mary Lian

Talent show zuamnak 1st prize – 1000 kr

Norway Chin Miss 2016    –        1000 kr 

4. Group discussion  

Tawlreltu: Ni Tha Bor

5. Hlasak Zuamnak (Song Contest)

Kum 14 cung a hopaoh hlasak i zuam khawh asi lai. Hlasak ai zuam ding nih Chin (Chin state chung dialect zeibantuk poah) hla lawng saknak nawl a ngei. A mah nih a duh mi band he sak/tum tti khawh asi lai. Tum piaktu a ngeih lo ahcun Hlasak Zuamnak tuanvo ngeitu Ral Siang Mang sinah ahnu bik April thla dih hlanah asak ding hla a pek lai. Hlasak zuamnak ah 1st prize ahmumi cu NOK 1000 le medal peek asi lai. Hlasak zuamnak ah Mark petu hna (Judges) cu a tanglei bantuk in kan thiam hna. (Contact Ral Siang Mang: 457 88 081)

( a ) Sui Lian

( b ) JK. Kham

( c ) Pau Pi

( d ) Sang Cin Thang.

6. Capar tial zuamnak

Capar ttial zuam aduhmi poah nih tawlreltu Saya Van Hei Lian sinah May 2016 dih hlanah ap dih din asi lai. Hi capar ttial zuamnak ah hin kum khiahmi (Limit) a um lo. Mizei poah hngakchia le upa he i zuam khawh asi. Zuamnak ah pakhatnak a hmumi

cu Certificate pek asi lai. Zeibantuk kong ttial ding timi tu cu, tawlreltu hna sinah contact ttuah khawh in hal khawh asi lai. Anmah zong ah follow up information an kan peek lengmang rih lai. Capaar ttialmi chektu dingah thimmi hna cu; Rev. Ceu

Mang le Pu Thawng Uk, Ni Tha Bor , Si Bawi Mang Lian an si te lai. (Saya Van Hei Lian Facebook: vanhailian)

 7. Lai Paih Zuamnak

Pu Van Thang hruainak in Pu Hre Tum le Pu Thawng Tha Hlei nih tuanvo kan lak piak cuahmah. Ka thazaang kai test ve ko lai a timi poah nih tawlreltu hna sinah thawngthanhnak le halnak tuah khawh asi lai. (Contact Van Thang: 93865013 )

 8. Adangdang

Registration fee:

Celh Zuamnak puai luhnak caah atanglei bantukin kan khan; a) Minung pakhat: kr 200 b) Unau pahnih: kr 400 c) Unau pathum: kr 500 d) Unau pali in acung: kr 600. Puai i ra ding poah nih May thla dih hlanah mah le area cio upa hna sin ah min cazin pek dih khawh cio kan i zuam hna lai. Puai zawhmi register le min cazin (List) tuahtu ding cu SCYF (Stavanger Chin Youth Fellowship) an si te lai.

Video/Hmanthlak Record Tuahtu (Media):

Hi kong a kan tawlrel piaktu dingah 1. Armstrong Lian 2. Biak Cung Lian Thawng 3. William Carey Muahhlun 4. SCYF nih tuanvo a kan laak piak te lai.

Security:

Khua pakhat ah minung 3 cio le innttek nih tuanvo kan lak piak te lai. Ara ding team leader/khua leader te nih tuan ah minung kan thim piak hna ulaw, puai tlamtling tein le dai tein kan dih khawhnak ding caah a kan tawlrel te lai.

Puai donghnak zaan:

A donghnak ni 2 July 2016 (zartteni) zaan cu concert tuah asi lai, hi concert ah hin a huam mi paoh i tel khawh asi ve lai. Music tawlreltu upa hna sinah tuan ah hlasak duhmi le tuahding (timhtuah haumi) um ahcun thawngthanh te hna usih.

Bawmhnak nak (Norway Chin Krihfa buu hna le Miphun dawtu pumpak chungkhar pakhat cio sinah):

Norway ahcun, kan Krihfa buu hna hi kan hrampi nan si ko. Ram chung ram leng cawlcanghnak bawmhnak a herhmi poah ah kan hrampi asi mi Krihfa buu hna nih kan tlangtlak hna lo ahcun tlam a tling kho lai lo. Cucaah tutan kan Celh Zuamnak zongah a dihmi phaisa tangka zong hi Norway ummi Chinmi Krihfa buu nan sinah bawmhnak ca kan rak ttial lio si. Arauh hlanah buu hruaitu upa nan sin ah a phan te lai. Zanghlei cawiin thazaang nan rak kan chuah piak cio dingin kan in nawl cia ko hna. Pumpak zongin bawmhnak (Sponsor) a kan pee khotu um u law, kan i lawm chinchin ko hnga. Sponsor poahpoah Lunglawmhnak Roca ‘‘Certificate of Appreciation” zong pee dingin ceihkhannak le hnatlaknak kan ngei cang. Chinmi caah thiltha tuah lam pakhat asi ve caah zaanghlei chuah cio dingin kan in forhfial ko hna.

Biadonghnak:

Kan puai ningcang tein kan tuah khawh nak hnga, ttuanvo ngeitu upa vialte nih zaanghlei cawi lawng siloin mipi zong nih lungthin, thazaang, thlacampiaknak le kan phaisa in ttanng cio hna usih! Hi celh zuamnak hi kan miphun, abikin mino hna caah tthahnem santlai asi ko lai tiah ruahchannak le zumhnak ka ngei ko. Kan biakmi Pathian tu nih kan umpi seh law, hlawhtlinnak kan pe hram ko seh.

 

Upatnak he,

Sang Cung Lian Darchum                                         Peter Sang Lian Thang

President, CCN                                                             Secretary, CCN

 

Scroll to Top