Zuatmi caw 92 rawl pek loin a thattu cu thla 4 thong an peek cang

Photo: VG

Chaklei Norway, Fosnes kommune um mipa pakhat nih a zuatmi caw 92 cu rawl peek loin thi lakin a rak hrem hna caah Namdal khua biaceihzung (tingrett) nih thla 4 thong le 63, 000 kr cawiliam dingin biachahnak an peek tiah VG nih a ttial.

Hi tluk faak in mah zuatmi saram hrem hi Norway kum zabuu tuanbia ah a um ballomi asi tiah theih asi. Saram dawtu silole kilveengtu buu hna nih cun, thla 4 chung te lawng thong tla dingin dantat cu a niam tuk, a tlawmbik kum 2 le cheu tal thlak dingin ai tlak tiah an ttang ve ti asi.

Hi kong hi 2015 march thla chungah an pauhmi asi. Eiledin zohcongtu (mattilsynet) Thawngpang an theih i an va hmuh tik cu, rawltaam in caw vialte an rak thi dih cang. 2015 chung lawngah mattilsynet nih eidin saram kongah thinphang asi tiah thawngthanhmi 2500 tluk an ngah ti asi.

Lung-thluak lei hlathlaitu hna (psykiater) pawl nih cun, minung hi kanmah pumpak nih, abikin kan no deuh lio caan ah, hremnak, mineeknak tibantuk kan rak ton ahcun, upat hnu ah kan ruhrang deuh ve, mi cungah hrem-neeknak tuah ve kan i harh ti lo tiah an ti. Hawi he tampi ai cawh lomi an si ahcun, anmah he ai naih bikmi sathil saram hna cungah fahnak peek an hmang ti asi.

(Theihternak: norwaychin.no cu Norway khuasa Chinmi Norsk a rel thiam ve lomi hna nih Norway thil cang thawngpang an theih ve ding kha ai tinh ve mi asi caah, ahopaoh nih kan miphun ca relthiam lo pawl ca ruat in i zuam ve cio khawh asi. chin_norway@yahoo.com )

Scroll to Top