Norway ah Chinmi tampi umnak Rogaland ah Chinmi upa 31 tluk telin ‘ton biaruahnak’ cu May 25, 2017 ah tuah asi. Hi tonnak hi Chin Community in Sandnes (CCS) nih a tawlrelmi asi i, Sandnes khua Immanuel Baptist Church (IBC) biakinn thar an cawkmi Brunesveien 30 ah nazi 13:00 – 18:00 tiang tuah asi.
Khua 6 in upa hna nih hmailei ah biaknak asi lomi cawlcanghnak zeitindah thazaang kan tthawn ter lai timi biahalnak cu biatak tein ceih asi. “Kan biaruah zong a thaw, hmuhtonmi kan i share mi zong ngaih a nuam, ruahnak thatha a chuak, hmailei saduhthah thatha zong kan theih. Lung a hmui ngai ko” tiah tawlreltu CCS leiin an chim.
Zapi dirhmun funtomnak an ngei kho i cucu atanglei bantukin asi:
ZAPI DIRHMUN FUNNAK (COMMON POSITION)
1) Khua kip ah local community dirh cio in cozah sinah register tuah cio ding;
2) Aralaimi kum zong ah “Rogaland Chin Forum” tuah tthan ding;
3) Krihfa buu hna he hmun khat tein miphun caah rianttuan tti ding;
4) Rogaland ai awhin “Lai laam” team ser kho dingin duhnak a um, khua kip organisation ttan laak tti ding;
Position 2nak asimi «Aralaimi kum zong ah “Rogaland Chin Forum” tuah tthan ding» timi kongah a tanglei bantukin tawlrel dingin kan lung tling;
– 2018 ah Rogaland Chin Forum tuah tthan khawh asi naak dingah CCS nih convener kan ttuanvo kan laak piak seh law, Rogaland khua pakhat cio i community organisation upa pawl he ceih khan ttinak ngeih in Forum tuahnak hmun, nilecaan, zeibantuk items dah ai tel lai, zei muisam le tlangtaar dah kan ceih hna lai? timi “Guideline” kan tuah piak kho hna seh tiah kan lung a tling.