Ralzaam pakhat dirhmun pom piak cang mi hna cu a tlang piin thla 6 le cheu chungah umnak kommune an hmuh piak tawn hna ti asi. IMDI nih kum 2012 chungah ralzaam 8600 hmunhma pe kho dingin kommune 312 sinah bawmhhalnak a tuah, sinain minung 5860 ca lawngah hmunhma hmuh piak an si rih ti asi. Hmaikum 2013 caah cun ralzaam 9000 hmunhma kan ser piak kho uh law tiah IMDI nih kommune pawl sinah thawngthanh le bawmhhalnak a tuah ti asi.
Kommune pakhat nih ralzaam ka laak ko lai a ti tikah cozah (State) nih bawmhnak a pek ve. Upa minung pakhat a mah tein a dir khawh tiang zohkhenhnak [sianginn kai holh cawnnak le ei le din] caah 651 000 Kr a pek hna. Hi zat phaisa hman dih hlanah mi cheu cu bawmh haumi dirhmun in an luat ko nain, a tlang piin Kommune nih upa pakhat kum 5 chung zohkhenhnak caah a hmanmi hi cozah nih a pekmi nak in a tam deuh i 738 000 Kr (kum 2011) a phan tiah tuak asi.