Oslo ah Tlaihhrem a Tam

0 Comments

Oslo khua ah kum 2011 tutiangah phuanmi tlaihhremnak voi 48 a chuah caah rampi in an ar ko. Nikum 2010 kha kumkhat chungah tlaihhrem case 24 a um, cucaah tukum ah a letkhat in a kai tinak asi. Cun thil poi khun pakhat asimi cu, tutiang palik nih an tlaih cangmi hna ah ramdangmi an tambik ti asi caah phundang piin mipi karlak ah thinlung a um ter.  Ramdangmi cungah Norway minung pawl an thinlung tampi ai thleng ti khawh asi. Hi bantuk thil tthalo asimi; tlaihhrem, fir, thah le nawn tamdeuh hi ramdangmi nih an tuah deuh ti cu, theih ngai cangmi case pakhat asi. Nain tutan thil hi cu, pipa asi i mipi lei zong in biatak tein ” Pakhatkhat”  tuah a hau cang ko ti bia aum caah thil pipa ngai asi ko cang.

www.rb.no i Rune Bernhus nih cun, hi kongah ramdang minung lila nih an cawl a herh, Norway pawl nih an au len zongah cutluk cun mual a ngei lai lo, cupinah miphun thleidannak a karh ter kho i miphun karlak ah buainak a chuah khawh caah mah tein biatak tein tawlrel ah cun thilttha bik asi lai ti in a ttial. Cun hi bantuk tleihhrem a chuahlonak ding caah zeitindah kan khamkhen khawh lai timi kongah buu tete zong an chuak.  Pakhat cu ‘Nattrypene‘ an ti i, zuri inn lawi kho tilomi pawl bawmh ding in mino nu tete nih an thawkmi asi.  Cozah lei le politician pawl zong nih biatak tein biaruahnak hi kongah an ngei- Oslo khua chung zongah palik an vaak deuh ngaingai ti asi, zaan zongah palik tamdeuh pi an chiah hna. Ara laimi ni pawl ah tampi thil ai thleng lai ti zumhnak aum.

Ruahnak an chuahmi tampi a um, bianaah, Oslo khuachungah Bus zantim ah a um lo caah, nuno tete lawinak an ngei tilo i motor ngeimi silole nu a rak kawlmi hna nih caanttha ah an i laak khawhnak asi caah, Bus nazi 24 chung chia ding tibantuk ruahnak hna an chuah. Thawng kum tampi- a fah khawh chung fak in thlak ding timi le, kan fanu [tu tlaihhrem tongmi hna hi mino an tam i, zurit hnu ah a tongmi an tam] le hna hi biatak tein fimkhur an thiamnak ding caah fim cawnpiak ding tibantuk pawl an chuah.

Norge Idol 2011 a zohmi kan tam ko lai ti zumhnak ka ngei i, thil pakhat a cangmi chungin tulio thil cangmi he ai pehtlai men lai tiah an ruahmi pakhat a um. Cucu kan hnulei deuh i an chuahmi Bianca Skoglie Lal  kongah asi. Hi nu te hi ramdangmi asi. Mi tampi nih a thiam ngai tiah an ruah, abik in hmak petu pawl nih a chuak colh rih lai lo, a kai kho rih ding dir hmun in an ruahmi asi. Nain ruah lo piin mipi nih vo an peekmi nih a tlinh lo caah a chuak. Idol hmakpetu pakhat asimi a hmurhmul a ummi pa Hans-Erik Dyvik Husby nih hi nu an chuah bak in  ” Vi har et problem i Idol” a ti colh. Chuahawk asi rihlo nain a chuahmi hi pakhatkhat cu ai palh cang ati mi nih thil tampi a kan ruah ter. Nai tlaihhrem kong thawngpang a rin tuk lio asi, ramdangmi cungah mipi lung a fah lio caan teah ai ton caah, Bianca cu ramdangmi asi ruang teah kai rih ding asi ko mi kha a tla tiah ruah khawh asi. Cucu hi hmak petu pa zong nih a sawh duhnak khi siseh law a dawh bik.

Hika zawn ah kanmah caah biapimi cu, kan umnak rianttuannak, sianginn kainak cio zongah zeimawzat cu a thlihran ai dang khomi asi- ka theihmi hna zong nih an ton cuahmah, an rian hmunhma an hi kong hi an ceihpi hna. Kanmah chungah kan far, kan fale hna nih zantim tiang zudin i vah tibantuk kha kan i ralrin deuh nak ding caah kan i chimh hna  aherh. Cun hikongah ramdangmi cungah mi ngiatu an karh chin lengmang caah umtu thutdir kan i ralrin deuh cu a hau ko hnga. Hi kongah kanmah direct in kan i tel rih lo hmanh ah indirect in cun telhchih kan si cang- ramdangmi titik ah kanmah zong kan i tel chih. Cucaah kanmah krihfabuu cio, inn chungkhar cio ah hi thawngpang hi kan i chimh cio a herh- theihnak cu fimnak asi ve bantuk in theihternak kan i tuahmi nih fim an kan chimtu si hram ko seh.

Ref:

http://www.aftenposten.no/nyheter/iriks/Ingen-anmeldte-voldtekter-i-Oslo-6689713.html

http://www.vg.no/nyheter/innenriks/artikkel.php?artid=10031153

http://www.rb.no/lokale_nyheter/article5793464.ece

Categories: