Oslo ah CCN Seminar Kan Tuah

0 Comments

Seminar_Oslo3  CCN nih tulio a tawlrel cuahmahmi Cross-cultural & Educational Seminar a voi 2nak cu Oslo pawngkam khuasa krihfabuu   NCMC biakinn ah minung 20- 30 kar kai in tlamtling ngaiin kan tuah khawh.

Zinglei nazi 10 thawk dingin timhtuah arak si nain, nazi 11:30 hrawng lawngah kan thawk kho. Oslo pawngkam um kan Chinmi hna abikin motor a ngei lomi hna caah Bus le tlanglawng ai laklawh deuh ruangah le thawng ttha deuh in kan theih lo ruangah minung tuan deuh ah kan chuah khawh lonak asi tiah a rak kai vemi hna nih an chim.

CCN nih special in sawmmi Sayakyi Ralhup le CCN aiawh in Peter Sang Lian Thang hna nih Seminar cu hruaiin hlunghlai ngaiin tuah asi. Sayakyi Ralhup nih “Norway ah nuhrinholh a biapit ning kong” tiah tlangtaar in lungtho ngaiin le lunglut taktak in a kan chimh. A ngaitu hna zong an lung a lut ngaingai, ai telvemi minung pakhat nih cun, “Hi tlukin Seminar nih ai timhmi le chim ding a tthat lai cu rak thei hna usih law, minung tampi kan chuak ko hnga, santlai taktak asi, CCN nan rianttuannak ah Pathian nih lam in hruai hna seh law tlamtlin ter hram ko seh” tiah a ti.

Peter Sang Lian Thang nih cun, “Ai dangmi nuphung cuaitlainak” timi tlangtaar in, Norway nunphung le Chin nunphung ai dannak tete zohin cuaithlainak a tuah. Ai dangmi nunphung kan ngeih hna hi i fian kan herh, kan cawn khawhmi nunphung a um ve bantuk in cawnawk tha lomi nunphung tampi an um, cawnawk tha lo si ko hmang hna seh law, kan umnak hmunhma nih a ngeihmi nundan le phung hi cu, a theih le i fian cu kan hau tiah a chim. Abikin theih-fiannak nih kan pawngkam minung hna karlak, phunglelam karlak ah ningcang tein le hnangam deuh tein kan um kho lai tiah achim.

Seminar_OsloJuly 2014 tiangah CCN nih seminar voi 9 tuah ai timhmi chungah voi hnih cu tlamtling ngaiin tuah asi cang. A voi thumnak Seminar tu cu, Sandnes khua ah tuah asi lai. Sandnes khua hi khua thum fonh in kanmah Chinmi hna nih krihfabuu an i pumhnak asi caah minung tamdeuh kan i fun kho hna lai i santlai thahnem chinchin asi lai tiah ruahchannak kan ngei.

Hi seminar tuahnak ah CCN nih phaisa tlamtling in a ngei lo nain, a rauh hlan ah Norway um Chin Krihfabuu hna sin ah bawmhnak hal ding zongin timhtuahnak ngeih asi. Cun pumpak in bawmh a lungthomi kan um ahcun bawmhnak peek khawh asi. Bawmhnak peek mi philhlonak ah lunglawmhnak roca zong tuah piak dingin ruah asi.

Seminar tlamtling kho dingin hmunhma a kan ontu NCMC Krihfa buu unau nupa vialte hna le tawlreltu thawngzamhtu upa hna nan cungah lunglawmhnak chimcawklo kan ngei.

 

Categories: