Norway siangpahrang Harald le anupi Sonja hna cu, December 1- 5 tiang Burma ah Norway aiawhin (State visit) a voikhatnak an tlawn lio asi. An mithila minung 70 le kampani 40 hrawng chungin ai telvemi hna cu, ramdang pehtlainak kong vuanci Børge Brende, chawlehnak lei tlai vuanci Monica Mæland, Oil & Energy department, Innovation Norway le pawngkam le nikhua lei zohkhenhnak lei upa pawl hna nih an zulh.
Burma an um chungah President Thein Sein, Shwe Mann le Aung San Suu Kyi, cun cozah silomi buu (Civil society) upa hna zong ton dingin timhtuahnak an ngei. Norway cozah website: regjeringen.no ahcun, tutan an khualtlawn mi nih ai tinhmicu: Norway nih caan saupi chung a ttanpimi akal cuahmahmi Burma thlennak kongah theihhngalhpinak tuah ding kha asi.
Ramdanglei vuaci Børge Brende cu, tulio Norway nih phaisa tampi a bawmhmi daihnak kong biaruahnak ah biapi in ai telmi cozah lei minung hna le tlangcungmi upa hna zong he tonnak a ngei colh tiah thawngpang theih asi. Chawlehnak lei upa hna zong nih anmah lei ttuanmi Telenor Burma cawlcangh, rianttuannak ah ttuanvo ngeitu hna zong he biaruahnak an ngei tiah theih asi.
