Chinmi a hmasa bik Norway kan ke kan lamh hi kum 2002, November thla ah a si. Kum 5 chung ah Chinmi kan karh chin lengmang i nihin ah cun, Norway khua/hmunhma 36 ah Chinmi 800 dengmang kan um cang. Tukum 2008 chung ah minung 1000 kan tling te ko lai ti hi kanmah Chinmi hna nih kan zumh ngaimi a si. Norway ram bantuk ram fate pakhat a simi le minung million 4. 5 hrawng lawng a ummi ram pakhat ah kan miphun 1000 tluk kan um tik ah kan National Day hi a rak biapi tukmi nii le caan a rak si hrim ko.
Kum 2005 avoi (57) nak Chin National Day cu, Norway ram khuapi a pa 5 nak zong a si i, kan Chinmi 150 renglo kan umnak khuapi Stavanger ah minung 100 reng lo nih avoikhatnak kan rak tuah. Culio ah cun min ngei in Music Band zong kan rak ngei rih lo i, rian a ngeimi zong kan rak har tuk rih. Holh a thiammi zong kan rak har rih i, ram chung thilsining kong theihnak lei zong ah chambaunak tampi kan rak ngei.
Kum 2006 avoi 58 nak CND cu, Moi timi khuate pakhat ah kan rak tuah. Moi khua CND ah cun tlawmpal cu kan thangcho deuh cang. Rian ngei tete zong kan hun um cang, holh a thiam mi tete zong kan hun tamdeuh cang. CND kong zong local media le, municipality upa hna, church lei pawl in upa cheukhat hna zong an kan tel khawh caah kan Chinmi hna nih a tulio kan aupi pakhat ah ai telmi ’’we want to be known” kong ah tlamtlin deuhnak kan hun ngei.
Kum 2007 avoi 59 nak CND cu Vest-agder timi pyine pakhat ah a ummi khuate Froland timi khua ah kan tuah. Tlamtlinnak tampi ai hung i chap. Hi kum tu ah cun, music band zong a min tein an hung dir kho cang. Minung zong kan hun tamdeuh I, rian ngei tete zong kan hun karh ngai ngai cang. Inn ngei, motor ngei zong kan hun um kho cang. Sianghleirun sangdeuh a kaikho mi hna zong kan hung um ve cang.
Kum 2008 cu CND tawlreltawntu Chin Community in Norway (CCN) nih CND cu hmun 3 ah then in tuah ding ah khuakhannbiakhiahnak an ngei. CCN hruainak in Oslo le Sandnes khua hmun 2 ah tlamtling ngai in tuah a si. Norway khuapibik Oslo ah cun tinbaw nganpi cung ah an tuah i, minung 270 hrawng an ni telkho tiin thawng kan theih. Lai laam a phunphun, biachimnak, hlasaknak tiin tlamtling ngai in an tuah tiah thawng kan rak theih ve. Rogaland pyine, Sandnes khua zong ah minung 200 hrawng nih CND cu hlunghlai ngai in kan tuah ve. Hi hmun 2 pin ah Froland khua ummi kan Chinmi hna zong nih CND cu hlunghlai ngai in Norway minung hna he an rak tuah ve timi thawng kan theih. Kanmah Chinmi hna lawng siloin, Norway minung hna he tlamtling deuh in an tuah khawh caah, Froland ah cun minung 100 hrawng an ni tel kho ti in thawng kan theih ve.
Sandnes Khua Le a Voi 60 Nak Chin National Day
Sandnes khua cu, minung 62,000 tluk an umnak khuapi pakhat a si i, Norway ram level in kan zoh tik ah apa 8 nak khua nganbik a si. Sandnes ah Chinmi kan rak phanhnak hi 2004 Septermber ah a si. Kum 4 tluk a rauh hnu kum 2008 February ah cun minung 34 kan phan cang. Aphan chawm ding zong an um rih tiah khuami hna nih an chim caah tam chin leikam an penh tinak a si. Norway Chinmi kan umnak khua hna lak ah cun khuadawtbik pakhat ah ai telmi le ramdang mi hna nih an tlawnkai duh ngaimi khua pakhat a si. Norway thlanglei deuh ah aummi khua a si caah a lum deuh ngai i, Asia lei in a rami kanmah miphun bantuk caah cun umnak khuarem taktak pakhat a si.
2008 CND kan tuah cu a hopoh a lungtling lomi te kan um loh. Lunghmuihnak nganpii kan ngei cio. Mikhual upa deuh kan ngeih mi hna lak ah Sandnes Vice Mayor, Kåre Hauge le Norway Baptish Union in General Secretary, Magnar Mæland hna nih biachimnak an kan ngeih piak. Tulio Massmedia a biapi tukmi lei in a kan tel pi kho mi hna cu; NRK (Norwegian Broadcasting ) TV, le minung a ting nih nifatin an rel mi Aftenbladet tadinca le Rogaland avis hna an ra kho i program kong le National Day kan tuah hnawhchannak asullam pawl tialnak an ngei. Cun NGO buu dangdang a simi, Point of Peace , Bike for Peace , sianginn lei le biaknak buu lei upa hna zong an kan tel pi khawh caah minung 200 tluk an si i a tlam a tling khun.
Laiholh in CND kong biachimnak zong a um i, Norway ram ah kan pa pakhat a simi Pu Lian Khia nih an kan chimpiak. Program lak ah minung an kan nuamhter bikmi cu, ringawn tumtu GOD SHADOW music band le hlasa mi kan farle naule pawl an si. Lai laam (Ruakhawhtlak, Saarlaam, Pupa laam, chanthar lailaam ) tibantuk hna nih kan Chinmi phun sinak fiangdeuh in an kan hmuhter. Lai thilthuam langhternak Fashion Show zong a um i kan far/ nau le pawl nih thilthuam a phunphun langhternak an tuah fawn. Tuchan IT chan he ai tlak in Microsoft Power point presentation hmang in kan Chinmi tuanbia le konglam chimnak zong a um. Chin Community in Norway statement relnak zong english in kan ngei.
Cun February 20 cu caw nithumni a si i, rianttuan nii lio pi a si ko nain minung tampi cu kan miphun ni pei a si cu tiah rianhmun kaltak riangmang in i tel a si tikah minung tampi nih kan miphun kan tanhnak an kan hmuhpiak pin ah kan CND tuahhnawnmi asullam cung ah lungfian deuhnak an hun ngei kho deuh ve. Khatlei kam in CND tuahkho ding in hmunhma a ongtu hna Sandnes khua aumi kan Chinmi hna zong nih thazaang, phaisa caan chuah lawng siloin hmaipenhbuu tein mikhual dawnnak le cawnglawmhnak an ngeih khawhmi nih kan Chinmi hna lawng siloin CND ah a ra khomi ramdang minung hna thinlung zong ah kan miphun lungput cung ah upathmaizatnak thinlung a um ter.
Azate huap in kan zoh tikah tukum Norway CND cu nuam ngai in le lunghmui ngai in kan rak hmang ve tiah kan miphun hawi hna sin ah thawng kan nin thanh ve hna.