Norway Phunghram Kum 200 a Tling Cang!

0 Comments

Photo:newsinenglish.no

May 17, 2014 cu Norway nih rampi uknak phunghram an ngeih naak kum 200 a tlin ni asi! Norway nih ‘Grunnlovdag’ – Phunghram ni’ silole ‘Nasjonaldag’ – Miphunpi ni tiah i uang ngaiin an auhmi ni, miphun pakhat ram pakhat hmelchunhnak ni sunglawi pakhat asi.  Kum 200 tlin ni asi tikah kum dang naakin a sunglawi khun, a bical deuh, michuak zong an tam i mi lung zong a cawlcangh ter ngaingai.

Oslo i hngakchia ai tlangin a kalmi (barnetorget), siangpahrang inn tual i minung a rami zeitik kum lio hmanh ah tu kum bantukin an tam lo ti asi. Siangpahrang te chungkhar cu an varanda ah nazi 3 hrawng an dir i record asi tiah an ttial.

Hi ni sunglawi ah kan ram pawngkam Scandinavia ram asi vemi, Denmark le Sweden ram zongin siangpahrang te zong an hun kan zawh ve. Siangpahrang pical pathum nih hlunghlai ngaiin an cawnglawmh i, khua kip le ram tampi zongah hla, laam, tirawl a phunphun in caan rak i hman cio asi.

1814 lio Norway phunghrampi hnatlaknak an tuah lio zuksuai minthang Wegerland nih a suaimi si. Photo:nrk.no

Tukum phunghram chuahni cu, kum dang naak zong in ramdangmi ai timi hna zong nih an hun cawnglawmh deuh ngaingai tiah thawng theih asi. Stiftelsen Kirkeforskning, KIFO timi buu nih hlathlainak an tuahmi nih a langh termi cu, Norway chuaklomi ramdangmi 60% hna zong nih lungtho ngaiin le sunglawih ngaiin tukum cu an hun telpi ve hna ti asi, cucu ram dangdang lakah atam pawl si tiah an ti. Cun lunglutawk ngai pakhat an hmuhmi cu, Scandinavia ram dangdang in a rami hna hmanh in ram dangdang in a rami hna nih hi bantuk ni sunglawi chuah caan ah chuahpi le cawnglawmh a tam deuh mi kong hi asi.

Skjermbilde 2014-05-18 kl. 19.58.20

Photo: Facebook/Asun Khenglawt

Morgenbladet nih Pakistan pa te bia an hal i a chimmi cu, “Norway minung nih hawi ttha tein an kan chonh hi May 17 ah asi, Oslo lampi khi Pakistan Punjab khuapi si seh law ka dawh ter,  ka nu hrim cu hi ni i lam ai chawh cu kan ram phun in ai ruah i, ai nuam tuk! “.

Norway ah biaknak lei le hlanlio phung le phai ttanpinak a tla deuh rua tiah ruah cuahmah lio ah thil lunglut ngai pakhat a hun langmi cu, naite ah poll pakhat an tuah i cu ahcun, 82% nih siangpahrang nawlngeihnak cu an ttanpi i, thazaang an peek ti asi. Siangpahrang te chungkhar le a ttanpitu hna mibuu caah cun thawngttha ngai asi kan ti ko lai!

lailam

Sandnes Chin pawl conglaizawnh an laammi video tawite si.

Norway khua cheukhat ahcun, Chinmi hna zong nih Lai lam le hla, a dangdang in Norway miphunpi ni cu kan lawmhpi ve hna. Facebook le sosial media dangdang hna zongin Norway miphun pini zong kan cawnglawmh ve. Thil dawh ngai asi ko!

Categories: