Norway Nganbik Krihfabuu le Nulenu-Palepa Ai Duh Pawl

Nulenu-palepa diriamh sualnak tuah le tthihum cu kan vawleicung tuanbia ah ‘mitamdeuh’ nih mumal ah hmuh asi kho rih lo i,  hmun tampi ahcun zuamhteih, mualpho-ningzak, hremnak tiang in an tuar ko rih. Chan ai hun i thlen lengmang, ram tampi ah minung tampi zong i ong chin lengmang asi i, hlan dirhmun nakin zalonnak a karh deuhdeuh tikah; hmunhma tampi ahcun phunglam ning tein tthihumhnak zong an tuah ter cang hna i, ai tthiummi hna nih an ngeihmi covo hna zong ningcang tein an ngeih ter ve hna.

Minung covo [Human rights perspective] lei mit in zoh ahcun, minung pei an si ve ko cu, an minung sinak ruahpiak a herh, upat thiam ve a herh a ti khomi an um ve bantukin; khatleiah Pathian sermi he ai ralkahin thil tuahmi an si, Krihfa Bible, Muslim Koran nih a duh lo, tabawah (သဘာဝ/nature) nih an kan serning asi lo, cucaah a dik lomi asi, ai titermi an si, tlaih hna ding, hrem hna ding, thongthlak hna ding, micheu lebang nih cun thah hna ding, tibantukin a domi zong an um. Ram tthangchobik, US, Norway tibantuk pawl hmanh ah, ruahnak ai tthengtthek rih i, biaelnak key a ttum kho rih hlei lo.

Norway ram thil sining tlawmpal vun zoh ahcun, homofil pawl hi 2009 January tthitumnak phung an thlen hnuin phunglam ning tein an i tthium kho, fa zong an i cawm khawh ve. Sek hmanning idan ruangah thledannak upadi hmun tampi ah khap asi. [1998 thawkin rianttuannak upadi (arbeidsmiljøloven) zongah an khap i, 2003 hnuin inn kong upadi (boligloven) zong nih a khap] Norway ah iruannak ttantu le thledennak dotu buu (likestilling og diskrimineringombudet) nih upadi pawl ttha tein ai zul maw timi kong hlathlai-zohnak an ngei peng ve.

Covo an hun ngeih deuhdeuh i, homofil pawl zong nih cun an covo kongah hmunhma kau deuh lak an hun duh ve. Norway state church zongah tthitumnak tuah kho dingin fak deuhin an hun nawr. Nai April 8, 2014 ahkhan, ceilakte biaelnak aum hnuin, upa tonnak an hun ngei i, homofil pawl biakinn ah tthitumnak tuah khawhnak kan pe hna lai maw? Timi agenda biatak tein an ceih. Vothlami 116 chungah 62 nih tthihumnak nawl pek hna ding asi lo tiah methlak biakhiahnak an tuah. Cutluk piin an i thlau lo- a ttanpimi zong cu an rak tampi ve tinak a lang.

Ttanpi mi hna lakah cozah lutlai an tampi lawng siloin, homofil bak  arak simi lila zong cu an um ve. Bianaah ngandamnak lei vuanci asimi Bent Høie (atang hmantlak) zong khi homofil pa cu asi i, va a ngei ve.  Nai Russia Olympic lio Homofil kong ceih tuk lio hrawng zongah khan, Russia cozah policy duhlonak langhter ruangah “ka vapa le Olympic kan i telve lai” tiah a phuangmi pa asi. Cun tutan Lutheren Church i homofil pawl tthitumnak ngahlo dingin vo an thlak ahcun a thin a hung taktakmi Homofil pa cu, Per Kristian Foss asi. Amah hi tulio cozah tlai  Høyre party ah biapi ngaimi upa saupi a rak tlaih lawng siloin tulio ram huapin phaisa cazin checktu  asi fawn. Nai biakhiahnak kongah Foss nih a chimmi cu, “Biakinn ah telve a duhmi nulenu-palepa duhmi hna caah cun, biang ah chet lakin bengh bantuk asi i, micheu pawl caah B tazeih cumh bantuk asi ko” a ti.

Theihtlei: 

Norway Lutheran Church kong tawi: 

– Kum 1537 ah an rak dirh.

– Norway milu 3.9 millions ( 77%) member an si.

– 2011 Norway fachuak 66% tipil an pek hna.

– Biakinn 1600

– Rianttuantu 6200

– Kumkhat (2011) phaisa cozah sinin an hmuhmi 4, 3 billions

– May 21, 2012 in Lutheran Church pi cu ram cozah he pehtlainak a cat, hlan ahcun Norway ram-biaknak cu Krihfa arak si nain tu cu official religion a um ti lo, State-church zong a um ti lo.
https://www.kirken.no/

Bent Høie (Helse Minister)
Per Kristian Foss

 

Scroll to Top