Norway Cozah Chung Thar Thlennak

0 Comments

October 2013 in ai thawkmi Erna Solberg (H) hruaimi Norway cozah cu party pahnih (Høyre le Frp) lawngin ai rak i thawk nain kum 7 a kal chungah ‘thlennak le tharchuahnak’ tampi a tong. Apical deuhmi ah, Norway tuanbia ah a um ballomi NAV minchiatnak le nai an cozah hawi Frp cozah in a chuahtakmi te hna hi an si.

2017 thimnak ah Solberg cozah cu thim tthan an si tikah, Venstre party zong 2018 January ah a lut ve. Cun, Krf zong 2019 January ah an hun lut ve tthan. Mahbelte naite January 20, 2020 ah zeidah a cang ti ahcun, Frp cu cozah kan chuak ve ti asi ko. Zeiruangahdah Frp cu cozah in an chuah?

Frp nih cozah in an chuahnak aruang cu; Norway rammi sinak a ngei cangmi Pakistan terrorist nu (fa pahnih a ngei, pakhat cu faak piin a zaw) Syria ram in Norway ah laak le laak lo kongah cozah hawi party hna he an lung ai khah lo caah asi. Cozah party dang dirhmun: Nu le fale hna kha Norway ah laak hna ding, sinain, Terrorist nu tu kha cu, Norway vawlei a lamh bakin thongah kuat colh ding.  Frp dirhmun; hngakchia cu laak ko hna ding, nain terrorist asi ko ti theih komi an nu tu kha cu laak lo ding.

Erne Solberg hruaimi Norway Cozah Thar. (Photo: https://www.aftenposten.no/)

Ram dangmi luhchuahnak rengh deuh a dirpi biktu Frp caah cun, terrorist nu Norway ah lutpi cu cozah in chuah ngamh tiangin an duh lo. An duhloning a faak, kan party dirhmun kan zumhmi le kan kalpimi a muru he ai kalh tiah an ti. Cozah in an chuak nain, Solberg cozah thlak ding cu an i tim ve lo. Solberg nih cozah a hruai hi cu thil dik asi ko tiah an ruah ve rih ko.

Tutan cozah in party pakhat an chuah hi, Norway tuanbia ah a voikhatnak asi tiah Aftenposten nih cun a ttial.

Cozah thar ah vuanci pa 9 thim tthan an si. Frp nih an chuah taakmi  hmunhma 7 le a dang pahnih; Arbeids- og sosialminister le klima og miljøminister hmunhma hna an si. Minister 20 chungah Høyre nih vuanci 12, Krf le Venstre hna nih hmun 4 veve an i laak ve.

Mithar a luhmi hna lakah lunglut ngai asimi hna cu; Krf party hotu Knut Arild Hareide (transport minister) , Venstre party in Abid Raja (Kultur- og likestillingsminister) le kum 33 lawng si rihmi Tina Bru  (olje- og energiminister) hna hi an si men lai.

Hareide hi Krf ah hotu dirhmun lawng siloin Bondevik (Krf) hruaimi cozah lioah Miljøvernminister (2004-2005) zong a rak ttuan bal. Norway politics ah dirhmun fek tein a ngeimi le mi nih an theihmi le upatmi asi.

Cun, Abid Raja asi, amah hi anulepa Pakistan an si i, Muslim zong asi. A pa hi sehzung rianttuan sawhsawh te khi asi. Anu cu ca rel/ttial thiam lomi te khi asi. A hngakchiat lio ah, a nulepa tukvuak a rak tong vemi asi caah Barnevern tawlrelnak tangah hmun dangdang ah rak chiahmi zong asi.

A dirhmun hi mi laklawh dirhmun a rak si nak zong a um len ve caah, a uarmi nih an tam nain, a huatuk zong an rak tampi ve. Norway Pakistan pawl an dirhmun tampi a zolanghtu asi ve caah amah miphun hawi lila chung zongah huatu tampi a ngei. Huatu an tam ruangah an umnak address hmanh hi zapi nih theih asi loh tiah an ttial.

(Caan um ahcun kan peh tthan te lai…….)

Categories: