Norway ah rian ngeilo an karh chin lengmang

0 Comments

Tinam (oil) man a tlaaktuk caah Norway bantuk oil tampi a zuarmi  ram hna caah cun, zatlaknak ngai asi ko. Aluan ciami kum 2 chungah oil he ai pehtlaimi rian a ttuanmi minung 15, 000 rian an sung cang, hi tining asi rih ko ahcun, caan rau lo teah oil he ai pehtlaimi rian 25, 000 tiang a lo kho tiah sipuazi thiamsang pawl nih an tuak.

 

Rian ngeilo tumkai a langhtertu graph Photo: NRK.no

Oil he ai pehtlaimi rian kan ti tikah, oil a chuahsertu kampani lawng kha chim duhmi asi lo i, a dang thilri ser le thluakchuah thilzuar lei in oil kampani a bawmchantu vialte zong kha chim duhmi asi. Asullam cu, oil man a tlak tikah ram pumpi sipuazi lawng siloin vawleicung sipuazi pi hmanh kha a hei hnawrsuan chih ve khawh tinak khi asi.

Tu bantukin oil man a tlak thluahmah nak a ruang tampi lakah biapibik pahnih a um. Apakhatnak; hlanah oil tambik a caw tawnmi USA cu anmah ram chung lila ah oil tamtuk an hmuh i an chuah cuahmah caah ram dangdang in oil a cawkmi a tlawm chin lengmang. Thil cawkduhnak thazaang a tlawm ahcun thil man a tla- supply & demand kan ti lai cu.

Apahnihnak ah technology thiamsannak akai chin lengmang tikah, kan seh hmanmi hna hi elektrik le batteri tibantuk ah ai hun i thleng chin ve lengmang. Cucaah oil in sermi diesel, datsi tibantuk kan hmanmi a tlawm chin lengmang- cawknak thazaang a zawr caah thilman a tla ve.

Vuleicung oil tambik a chuah-zuar vemi Saudi ram an prince Alwaleed nih, kha hlan oil man tlukcun hmailei ah a kai kho ti lem lai lo a ti. Mi cheu tu nihcun, a kai tthan ko lai an ti ve a ruang an tuak ve ningah, a ra laimi caan ah China le ram kaicho lio dang hna nih oil an hmanmi a karh chin lai caah, oil man a kai tthan ko lai tiah ruah channak an ngei ve.

SSB tuak ningah, tulio Norway ah rian ngei lomi hi, 127 000 leng an kai tiah an ruah, i cucu 4.6 % asi. 2006 in tutiang ah rian ngeilo tambik level kan phanh lio asi. 2017 donghnak lei lawngah duhsah in rian kongah niceu kan hmuh tthan khawh lai tiah economist pawl nih an ruah.

Photo: e24.no

Cu ti thawngpang a chia ko nain, thil khuaruahhar ngai asi ve mi cu, inn man pawl an kai ti asi. Nikum tulio bantuk he inn man kai ning tahchun ahcun, 5.2% a kai tiah E24.no nih an ttial. Tulio inn man a tlangpiin kvadratmeter pakhat ah 36.835 kroner asi. Januar thla chungah Norway ram pumpi ah inn 5606 an zuar khawh.

Categories: