Mino le Dothlennak

By, Zing Biak Hnem Famcun

Atu lio thil a cang mi le mah tlangtaar hi mino lawng si lo in, miza pi nih theih a herh hrim hrim mi asi. Zeiruang ah ti cun, a tu kan ram, Myanmar zong ah siseh, adang vawlei ram zong ah, mitam pi nih an ton cuahmah lio mi thil an si. Tuanbia (history) ah kan zoh ah kan vun zoh tthan ah cun, mino chung in dinlonak silo le , duhlo nak a langh ter mi hi an tlawm ngai. Cu ruangah mino nih kan duhnak le duh lo nak langhter hi a har tuk mi thil zong an si ko lai. Sinan tein mino nih kan tuahnak a ruang ngan bik cu, vawlei/ram ttha deuh kan duh caah si (a better world/society). Mah ruangah mino hi kan biapi tuk, lungrual tein kan tuah tti a herh.

A biapi hmai ka kal hlan ah, dohthlennak ti mi a sullam hi, kan I fian tak tak a hau. Dohthlennak (revolution) ti mi hi phunhnih in ka hmuh. Phunhnih dohthlennak (revolution) ti tik ah:

  1. Hriamnam raldonak zong a um (violent revolution).
  2. Hriamnam tel lo raldo nak zong a um ve (non-violent revolution).

Dohthlennak nak hi a hlan lio pi zong ah kan ram zong ah siseh, adang ram zong ah siseh a cang peng mi a si ban tuk in. Hriamnam raldonak ah hin, meithal le nam hi hmanbik an si i, thih le nun ral do kan ti lai cu. Hriannam tel lo raldo nak ah cun, cafung si lo le social media hi hmanbik mi an si. Dohthlennak ah cun hriamnam raldonak zong in tei nak a tam pi a um ve bantukin, hriamnam lo zong in teinak hmuh khawh a si ve ko.

Mino nih kan ti khawh mi cu, mirang holh ka vun i hlan ah cun « Raise your voice” ti si lai. Kan mah ram Myanmar ah a um mi, mino tu cu ralkap lei in, kan zoh hna ah cun raldo mi zong an tam pi ve. An hriannam in, ral an doh cuah mah lio hna ve ah. Kan nih ram dang ummi , mino hi zeitin in dah kan duhnak le duhnak lo kan langhter khawh ve lai?Zeitin dah kan bawmh khawh ve hna lai?

Mino pawl nih a tuah mi zong an tam pi cang ko nan in, chapchih ka duh mi a dang pawl zong an um. Atu lio ah vawlei cung nih kan hman bik mi cu social media pawl hi an si tik ah. Facebook, Instagram, Snapchat le Twitter hi a lar bik mi an si i. Laimi zong,ramdang pawlzong , mah cun minthang pawl zong nih an hman tuk ve. Hriam le nam in kan do khawh lo caah, social media pawl ah cun kan aw “our voices” kan langhter ve ding bak si. Kan ram kong hi kan kan facebook ah siseh, kan instagram ah kan ttial ding, kan tar ding le kan chiah ding an si. Vawlei cung miphun pi nih hmuh khawh ding tiang in tuah khawh I zuam ding si.

Mah cun Norway chung zong siseh, kadang ram zong ah an tuah mi protest/ demostration (duh lonak langhter) ti mi zong hi a herh bak fawn. Kan duhlo nak kan langhter mi kha, ramdang mi zong nih a kan hmuh. A tu lio ah , kan ram cu a si faak mi ram si ve bantukin, kan bawmh khawh ve mi hna cu chawva lei zong in thazaang kan pek khawh ve hna. Atam deuh mino pawl cu sianginn kai mi tampi zong kan um ko nain, Norway tangkaa 50 te zong kan bawmh khawh hna ah cun, an mah caah san a tlai tuk lai tiah ka zumh. Adongh nak ah a biapi bik in ka hmuh mi cu, Pathian sin ah thlacam hi a biapi bik. Laimi le khrihfa kan si ve bantuk in, kan i bochan awk,pakhat nak ah kan chiah peng ding mi cu kan Pathian asi ding asi. Kan Pathian nih a tuah khawh lo mi thil zeihmanh a um lo bantukin, thlacam bawmhnak lei zong ah kan tthan cho hna i, kan ttan tti a hau.

Hlanlio chan i cozah thlennak i aa tel ve mi (revolutionist) Che Guevara nih a chim mi cu “ The revolution is not an apple that falls when it is ripe. You have to make it fall”. Atu lio a cang cuahmah mi ah hin, mino pawl nih hmai lei ah, mah cu kan tuah te lai, a tu cu a caan si rih lo kan ti ding si lo. Lungkhat, lungrual tein hmai ah fong tti ding a si.A tu a can cuahmah lio ah , kan thazaang,kan ngeihchiah chawva, kan fimnak le thiamnak, kan hriamnam ttha bik pawl kha hman caan a cu cang.

(Note: Hi capar hi “Mino Civui 2021”, Froland ah tuahmi capar ttial zuamnak ah “Mino le Dothlennak” timi tlangtaar in pakhatnak laksawng a hmumi capar a si. Catialtu hi Zing Biak Hnem Famcun a si. )

Scroll to Top