India ram nichuah chaklei Mizoram Saiha district Laki khua pawngah Mara hriamtlai (Mara People Army) minung (2) hna cu Mizoram palik nih 13.02.2012 ni ah hriamnam he an tlaih hna tiah thawng kan theih.
Saiha khau Deputy SP Laicha nih “Cu kaa hmunah an um ti thawng kan theih caah kan va tlaih hna, atu cu thonginn ah kan kuat cang hna” tiah a chim. M-16 meithal zuun (1), kuan bawm (2), kuan (156) le biachimnak seh (2) zong kan tlaih chih” tiah Laicha nih cun a chim.
Minung thazaang (20) hrawng a simi Mara People Army(MPA) cu kum 2009 hrawngah an rak dirhmi bu a si tiah theih a si. Chin ramkulh hmunkip ah a ummi hna Mara miphun paoh kha uknak pakhat tangah um ding kha an i timhmi cu a si tiah theih a si.
Hi hna bu cu Mizoram le Chin ramkulh ramri ah hmunhma a khuar i a cawlcangmi an si i, Paletwah peng Pawngmu khuami a cheu hna kha an rak tlaih(pianpe an suai) hna le phaisa in an rak tlanhter hna ruangah Mara mipi nih kan duh ti hna lo (kan ṭhohkhan) ti hna lo tiah Saiha khua ah a ummi Mara miphun pakhat nih a chim.
Hi an tlaihmi hna kong he pehtlaiin Chin National Army biuha (2) in ralkap bawi pakhat nih atu i an tlaihmi hna pawl hi cozah sinah hriamnam chiah dingah aa tim lammi an lo tiah a chim.
Mara hriamtlaibu pawl cu kan hnu caan tlawmpal lioah khan cheuhnih ah an i ṭhen le MPA chungin a chuakmi cheukhat hna cu Chin ramkulh Paletwah peng Satongte ralkap sakhan ah hriamnam an chiah tiah theih a si i, atu i an tlaihmi hna minung(2) hna cu Mara People Army(MPA) chungtel an si tiah theih a si.