Kum 10 Atling Cangmi ‘Intro Program’

0 Comments

2013 Intro program a dih hnuah zeidah an tuah timi a langtertu hmanthlak. [photo:imdi.no]

Norway nih laakmi silole mah tein a rak phanmi ralzaam le an chungkhar hna sianginn kan peh khawh i, rian kan ttuan khawhnak caah hram an kan dawmhpiaktu program asimi ‘Introduksjonsprogram’  cu 2004 ah an rak thawk caah tu kum 2014 in cun kum 10 a tling ve cang. Program nih a rak i timhmi cu a kaimi 100 chungah  70% hi program an dih in rian silole sianginn peh kho viar hna seh ti asi. Hi kum 10 chung dirhmun an zohhlat tikah kum khat hnu kumkhat tthancho lei kan penh tiah an hmuh.

2004 hlanah cun, Norway nih a laak hnami ralzaam Norway an phanh tikah umnak inn, ei le din caah phaisa tiin bawmhnak sawh men in a rak peek hna. Holh kha an cawng ve nain, rian pakhat bantukin rak cawn ter asi lo, huam lomi nih an cawng lo, nain phaisa bawmhnak an hmu tthiamtthiam. Norway ‘phung’ asimi ram chung ahopaoh eidin le umnak ngeih lo in kan um lai lo tiah timhtuahnak he an rak sermi sosial security nih a huap chih ve tik hna ah cutluk tthanchonak um loin caan saupi chung ram chungah khua kan rak sa tawn hna.

Introduction program cu kum 18- 55 karlak hna caah sermi program asi nain, dirhmun sining nih a peek ahcun kum 55 cung zong nih an hmuh khawh ve. Intro program nih Norway phanmi paohpaoh an holh le ca lawng siloin rian cawnnak caah rian hmun le hma an kan sersiam piak i cu a hrambunh piakmi in hmailei cacawnnak, rian hmuhnak caah an hun kan bawmh hnuah, ramdang mi hna cungah tampi tthanchonak a um ko tihi an hmuh chuak cang. SSB hlathlainak nih a langhtermi cu, ram dang in a rami hna nih hi Program an dih hnuah rian a ttuanmi le sianginn a peh tthanmi an karh chin lengmang ti an hmuh.

Nihin ah program a kaimi milu 13, 000 an si  ti asi i, 2011 i program ai limmi 100 lakah 63% hi rian silole sianginn an peh kho ti asi. Cucu 2010 he tahchun tikah 2% a kai tiah report nih a ttial.

2007 – 2011 tiang Introdution Program result report hika ah rel khawh asi.

Categories: