CCN Seminar a voi 3nak cu November 23, 2013 ah Immanuel Baptist Church (IBC) khrihfa chungtel hna pumhnak Sandnes khua ah tlamtling tein kan tuah khawh.
Lungfim upa minung 35 leng an rak kai kho hna i, chun nazi 12:30 – 18:00 tiang nuam ngaiin le lunglut ngaiin kan tuah khawh. Program chungah ah telmi hna cu, nuhrinholh cawn a biapitning (Pu Adam Ral Hup Thang) , Norway ah ngunkhuai (Skatt) peekning (Pu Thang Hlun) le Norway phan ramdangmi hna kong (Peter Sang Lian Thang) timi pawl an si.
“Hi bantuk fimcawnnak seminar hi tuah pah khawh lengmang ahcun kan miphun caah san a tlai tuk hnga, abikin nuhrinholh cawn a biapitning kong te hna hi kan pa le lawng siloin kan nule hrim zong nih thei ve hna seh law, anmah ko hi kan fale a zohkhenhmi an si caah, an biapi khun, kan i lawm tuk, rak kan zuampiak ko uh”, tiah IBC an chairman simi Pu Tin Ceu nih a ti.
IBC Secretary tuanliomi Pu James Biak Lian nih cun, ” CCN cawlcanghnak hi a tu a voikhatnak kai tel khawh asi, i nan thilti a ttha ngai, ka lung a tling ngai, kumkhat voikhat hrawng hi cu Norway krihfabuu pakhat cio sinah kan tanh pah kho lengmang u law cu a tha tuk hnga, CCN hi manlo thazaang (Frivillig) lawngte kan ttuan nan ti tikah Krihfa buu hna zong nih zeimawzat hi cu kan nin ruahpiak hna ah a tha ko rua, kan miphung caah a tthami nan tuahmi cungah mipi le buu pakhat cio nih thazang peek dingin ttuanvo kan ngei ve rua ka ti” a ti.
Nuhrin holh a biapit ning kong ceih lio ah biahalnak tampi tuah asi, bianaah, Kommune pakhat cio ah nuhrinholh cawnpiaktu le hna nih pakhat le pakhat biaruahnak rianttuanttinak hna nan ngei kho hna maw? Nuhrin holh lawng siloin nuhrinholh a cawngliomi kan fale hna nih a dang an cawnmi kongah bawmh khawhnak hna nan ngei kho hna maw? (chimduhmi cu nuhrinholh cawn lio caan ah a dang cawn ding hna he ai thuat ah cun zeitin khin dah kan tawlrel ah dah a tthat bik? ) timi biahalnak tete hna cu, nuhrinholh cawn a biapit ning a kan chimtu Pu Ral Hup Thang nih lehnak le hrihfiahnak a kan ngeih.
Norway ah nukhuai kan peekmi hi khawzeiahdah a kal? Ngunkhuai peek hi rammi pakhat nih covo i theih zong asi, moral he ai pehtlaimi thil biapi pakhat asi zia le zeibantuk dirhmun in skatt kan peek tikah zeibantuk pawl dah theih fian kan herh nak kong le, pumpak rianttuan tu pakhat cio nih theih a herhmi tete le covo tete hna cu Pu Thang Hlun nih chimhfiannak an kan tuah. Biahalnak zong tampi tuah len asi, phaisa tangka kong asi tikah theih a herhmi le theih duhmi ai tam hringhran ko.
Norway phan ramdangmi hna kong ah, tulio ah ramdangmi milu 710 400 kan si cang (Ramdangmi nulepa hna nih Norway ram ah an hrinmi hna fale), mah lakah refugee nih cheu li cheukhat kan si. Sianginn kai bak in a rami hna hi kum 2012 chungah khan 19,000 renglo kan si. Cun, tutiang ah Norway ah khuasami kawlram minung vialte fonh in, 3856 kan si i Norway ramdangmi vialte hna lakah 36 nak tambik kan si timi pawl kong le mahbantuk dirhmun chungin kanmah Chinmi hna zong nih zeitindah kanmah kong kan i theih ve a herh i, kan i theihmi kanmah kong thawngin midang karlak le hmai kan nawrnak ah zeitindah kan kal khawh lai timi kong cu Peter Sang Lian Thang nih an kan chimh.
Kan seminar program cu kl 17:00 dih ding in timhtuah arak si nain, biahalnak le bia a thawt deuh caah kl 18:00 tiang kan hmang kho hna. Hramthawk ah Pu Tin Ceu nih thla a kan campiak i, Seminar tuah khawhmi cungah lunglawmhnak biachimnak cu IBC Pastor Ceu Mang nih a kan chim piak i, a donghnak ah Pu Ngun Mong thlacamnak in kan dongh ter.