Hnakhaw Ngandamnak

marysung

Hna-ek

Hna-ek cu tih a nung lo, hnaek cu hnakhaw chungah a um awk hrimhrim a si. Aruangcu hnaek nih hnakhaw chungah thilhnawm tihnung a luh lonak dingah a khamh. A si nain mah hnaek cu coih bal lo ahcun aa pum dih lai i, hna a chetter khawh.

Hna-ek a umnak a ruang

Hna-ek cu hnakhaw nih a chuahpi mi a si.  Hnakhaw kam zawn te (ear canal) in hnaek hi a chuak (produce). A lenglei thawngpang kan theih khawhnak ding caah ear canal hi (atmosphere) lenglei thli, thawngpang le eardrum karlak ah rian ttuantu a si. Hna-ek nih ear canal kha a nalter i hnakhaw vun zong kha zawtnak le pornak in a khamh. Hna-ek kha duhsah tein a lenglei a chuah i, hnakhaw chung i a bangmi le  hnawm tete zong kha a chuahpi hna. Hna-ek cu a ngan tuk a si ahcun, a chuak ding tlukin a chuak kho ti lo i hnakhawh chungah a hlum in a taang. Mah hna-ek tompi ruangah hnachet, tinnitus, hnakhaw thak le siarem lo, hnakhaw fah le lungmih khawh a si.

Zeitindah hna-ek ruangah zawtnak in na luat lai?

  • Hnaek cu zawtnak phun tampi chungin hnakhaw a khamhtu a si ruangah, hna an hnawh tuk lo ahcun tuai tuk lo ding.
  • Hnakhaw chungah thil zeipaoh sawh ding a si lo. Lachawn fung in hna-ek i coih tuk ding a si lo. Lachawn kha na hnakhaw chungah a tang kho i, hna-ek he aa cawh tikah hnakhaw in chuah a har.
  • Hnakhaw chungah sawh le hnorh peng cun eardrum le ear canal hna kha a tthih i, hnakhaw nih a herhmi lengin hnaek a chuak (produce) theu tawn.
  • Naciat le headset te hna thangtuk hman ahcun hna-ek kha ning cang loin a cawlcang i bia /thawngpang tha tein aa thei kho ti lo.
  • Hna-ek ruangah siarem lo tukin na um ahcun hnaek ttawlnak dawr ah cawk khawh a si. Nangmah tein na tuah ngam lo ahcun na doctor bawmh hal a ngah.
  • Eardrum cu hnakhaw darkhing tluk a si. Eardrum cu a pan tuk i fak tuk na sawh cun a rawk lai, na hna a chet lai.

Lachawn fung loin hna-ek coih ning

Ti a sa tuk lomi le a kik tuk lomi, ti khawlhnak ah na hmanmi tluk (ca. 37 °C) hrawng a simi in hnakhaw i tawl khawh a si. Hna-ek nganpi cu chiti a lummi dor khathnih thlak in ni hnih hlan ah a maan i a chuak kho. Hna-ek na tawl caan ah sir lei in na it, silole a lenglei chiti a luan lonak ah  hnakhaw kha na phih piak lai. Sii dawr ah zong voikhat hman a simi hna-ek ttawlnak an zuarmi a phun tampi.

Na hna-ek ruangah siarem lo ngai le na lung re a thei cun doctor sinah kal cawlh law an in bawmh lai. Norway mi tampi cu doctor sin an kal lai nihnih thum hrawngah siidawr i an zuarmi mah tein hnakhaw i ttawlnak an hmang tawn ko. A pack ah a hmanning aa tial dih, cun siidawr i rian tuanmi zong na hal khawh tthiam tthiam hna.

Na hnakhaw he pehtlai in zawtnak maw silole eardrum / hnakhaw chungah hma ka ngei rua tiah zumhnak na ngei cun zeitik hmanh ah nangmah tein na hnakhaw i ttawl hlah. Doctor sinah kal law tha tein an in checkhlai.

[Cattialtu Mary Sung hi University of Agder, Kristiansand ah Sykepleier/Nurse a kumkhatnak a kai liomi si. Hi a article hi amah blog: http://marysung.blogspot.no/ ah amah nawlpeeknak in kan laakmi asi i, contact duh ahcun a  facebook ‘marysung sathin’ ah contact tuah khawh asi lai.] 

Scroll to Top