Facebook, Mi Ngiatnak?

0 Comments

Intenet webpage Facebook ahmangmi hi vawleicung ah million 500 kan phan ti asi, siahcun, vawleicung minung vialte zakhat ah 8% hi facebook a hmangmi kan si tinak asi. Norway lebang ah cun, Facebook ahmangmi million 2 hrawng hrang kan si ti asi. Million 4,7 hrawng lawng aummi ah milu 40% nak tam nih Facebook kan hman tinak asi.

Facebook hi a thatnak atam pi nain, a hmang thiam lomi, mahlemah tha tein ai veengkholomi hna caah cun, kanmah le kanmah kan zo kan i langhnak, rap kan i awhnak thil pakhat zong asi fawn. Abikin Facebook kan hman tik ah, facebook tawnghthamnak caah a herhmi holh (english maw norsk ) maw tha tein kan rel khawh lo siloah tha tein kan rel lo i, kan i fian loah cun, setting tete kan palh kho, term and condition timi zulhding phunglam hna kan thei hnga lo i kan duhmi thil tete hna zong kha, Norway kan rak phanhka i JA JA JA kan ti nak ah kan i chuahsual tawnmi capo hna zong in kan saih tawnmi kha can sual  a fawi.

Hi Facebook ah membership kan luhmi kong ah acunglei ka langhtermi hna kan theih lomi nak in a poi deuhmi thil aum tawn mi cu, midang nih kan facebook hmang nih kan ziaza, cawlcanghning an kan ngiat tawn timi kan i theih lo hi asi. Bianaah, internet ram huap in tha tein a hmang cangmi hna ram pawl ah cun, minung pakhat nih rian a sok tik ah, rian ngeitu hna nih, interview an tuah hna hlan ah Google an hman i, an konglam an kawl theo hna, Facebook ah a um maw, zeibantuk minung dah asi ti kha, mipum tak ton hlan hrim in tampi theih khawh an rak i zuam cang. Facebook ah si lo ning deuh in khua asami minung tampi cu, rian kawl an i harh ngai, rian a ngei cangmi hna hmanh siloning deuh in thil an tuah ruangah rian in chuah a tongmi hna kong zong rel khawh asi.

Cun, Norway ah nulepa hna nih an fale zeitindah an cawlcangh ti kha, facebook an hman i chet tiah an hlat ve tawn hna ti asi. Nulepa pawl lila nih an fa le hna he hawi an i tuah, i an kalum cawlcanghnak kha an hlat hna ti asi. Cucaah, tuchun kan vawlei hi hmuhkhawh tonghkhawhmi lawng ah a cawlcangmi le rian a kalmi si ti loin, hmuhkhawh lomi, tonghkhawh lomi thil hna hmang zong in kan cawlcangh, kan i zoh hna, kan i hlat hna ti hi theih a herh ngai cang.

Internet kan hman cio tik ah, kan hmanmi internet nih thathnemnak a chuahpi ve bantuk in, hmanthiam lo ruangah silole zeidah a chuahpi lai ti ttha tein ruah loin duhpoh in kan hman ruangah kanmah le kanmah zo kan i langh lo ding in i ralrin deuh cu kan hau taktak ko. Phone kan hman tik ah number an um ve bantuk in Internet kan hmanmi zong ah number an um ve cucu ‘IP address’ tiah an ti, cun kan IP address lawng hmanh siloin, internet kan kau tik ah ID pakhat khat kan hman tawn i, cakuang maw, bank maw siloah adangdang kan tuah tawn, kha bantuk in kan tuah tik zong ah website kan luhnak hna nih kan cawlcangh an kan theih zungzal timi theih awk  asi.

Internet nai hunh bak, kan hun kau len, kan vahvaih len ah khin, kanmah lawng in ramlak a vakmi bantuk siloin, innchung meiceunak ah camera tampi an chiah i an kan thlak bantuk in a um mi dirhmun hi khin ai lo ngai. Cucaah ralrin deuh in le tuanvo thei/ngei bu tein kan tawngh cio ding hi biapi ngai ngai tiah ruahnak ka ngei.

(Edit loin kan tialmi asi caah cafang palhnak  atam kho men, caan kan ngeih tik ah edit tuahthan kai zuam te lai. Tuchun ka relmi Aftenposten tadinca chung ah Facebook ahmangmi nulepa hna kong in ka lung achuakmi ka tial mi asi.)

Categories: