Europe Ah Dawrnak Halmi An Karh, Norway Ahcun An Zawr

Photo: fokusert.com

Europe huapin dawrnak halmi 25% an karh nain, Norway ahcun kumdang nakin dawrnak halmi an tlawm deuh caah Asylum Center pa 7 an khar tiah ralzaam pawl bawmtu nganbik buu pakhat asimi Hero nih a thanh.

Norden.org nih a tawlrelmi data ningin, Norway hi a pawngkam ram, Danmark, Sweden lakah dawrnak halmi an tlawmbiknak ram asi, 2014 tutiangah minung 10000 fai lawng nih dawrnak an hal. Mahlioah, Sweden ahcun, minung 70000 le Danmark ah minung 13000 leng nih dawrnak an hal cang.

Hmaikum zongah an tuakmi cu, Sweden hi mi tambik nih an penh rih lai, 100 000 leng an phan te lai ti asi, cun Danmark ah 20000 le Norway ah 11000 leng nih dawrnak an hal te theo lai tiah an tuak cia. Europe chungah Sweden hi dawrnak halmi an tambiknak a pa thumnak ram asi- Germany le France changtu asi. An ram milu tuak incun, Sweden hi mitambik dawrnak a pemi ram an si tiah theih asi.

Dawrnak halmi mi tambik hi, ral a tho cuahmahmi Afghanistan, Eritrea le Syria ram in a rami an si. Syria ramchung i thahnawnnak nih mi nunnak 100,000 leng alaak cang i ralzaam 2,8 million a phanh ter cang. Hi nih EU chungah dawrnak halmi minung tam chin lengmang a phanh ter rih ko lai tinak asi. Norway zong nih 2014 chungah Syria ralzaam minung 1000 laak dingin biachahnak a rak tuah.

Ref: hero.no, aftenposten.no.

Scroll to Top