Chin Ramkulh Nih a Ngeih Awk A simi A Ngeih Lomi Covo

Kawl ramchungah ramkulh le ramṭhen (14) a um i, cu ramkulh le ramṭhen chungah cun fim cawnnak sianghleirun & sianghleisang (college & university) sianginn a um lonak hmun le hma a um lo. Vanlong kawrawn lei ti ah le hmun dangah cun an um dih fawn, cun lam le sul leiah ti ṭhiam ah le hmun dang cu a ṭha viar thotho. Cupinah chawlehthalnak lei le rianṭuannak lei in kan zoh rih a si ah le hmun dang ramkulh le ramṭhen hna ah cun sehzung (zeibantuk sehzung paoh) an um dih fawn ṭhiamṭhiam, a um lonak ramkulh le ramṭhen hrimhrim a um lo. Kawl ramchungah kan Chin ram cu pehtlaihnak lam le sul a ṭha lo bikmi a si lawng si loin pawcawm eidin khuasaknak leiah le a sifak bikmi le a harsa bik cem tiah ti a si fawn hoi.
Asinain hi kongah, zeibantuk kong hmanhah Kawl cozah nih aa theihter duh lo i, Chin ramkulh ṭhanchonak dingah aa hmaithlak in a ṭuan duh lo. Lam le sul a sersiam duh lo, angki hring aa hrukmi hna (a ralkap) an umnak hmun tiang lawng mipi hna thazaang hmangin lam a kan cawhter. Kawl cozah nih Chin ramkulh chungah zeibantuk sehzung(rian sehzung) hmanh a dirh in a tuah duh lo. Hmun dang ramkulh le ramṭhen hna ah cun sianghleirun, sianghleisang sianginn hmunthum le hmunli ah an um hna. Vanlong kawrawn (tualhmun) zong hmunthum le hmunli tiah an um dih fawn hna. Hi chungah, hi vialte chungah hin kan Chin ramkulh chung lawnglawng ah a um lomi a ngei lomi a si. Cucaah cun Chin ramkulh nih a covo a simi le a ngeih awk hrimhrim a simi a ngeih lomi hi ruah tikah Kawl ram cozah cu minung covo a buarmi lawng si loin (cucu um rih seh) Chin ramkulh covo hrimhrim fak tukin a buar le a kan chuh a si. Hi kong ka ruah paohah ka thin a haang le Kawl cozah ruangah ka pawng i a ummi Kawl miphun a simi paohpaoh thah le nawn ka duh tawn hna.

Cucaah cun atu le hmailei cun ram zong ṭhat lei a panh thluahmah ko cang lai caah hin ramchung, ramleng ah a ummi si hna usih, Chin ramkulh chungah cozah rianṭuanmi vialte si hna seh, fimnak a cawng liomi sianghngakchia, sianghleirun, sianghleisang sianghngakchia vialte hna le Chin ramkulh caah rian a ṭuanmi vialte zeibantuk bu le party si hna seh kan Chin ram caah hawihlan bik le hmaifuang bikah chia in ṭuan dingah i hmaithlak hna usih tiah chim ka duh.

Chinmi phun nih kan hmuh awk, kan ngeih hrimhrim awk a simi le kan covo (Chin ramkulh covo) a simi vialte kan hmuh lomi le kan ngeih lomi hna a bikin (1) Sianghleirun, sianghleisang sianginn, (2) Vanlong kawrawn (3) Pehtlaihnak lam le sul le (4) sehzung kong hna hi a si, si khawh nakin le a ngah, ngah khawh nakhnga, ngah kho ding hrimhrim in cozah sinah hal peng ding kha a bikin rian biapi bikah chia in Kawl cozah nih a kan pek duh lomi kan covo (Chin ramkulh covo) hna kha a kan pek hrimhrim nakhnga hi vialte hna hi kan Chin ram sersiamnak ding caah a pakhatnak bikah kan tuah kan ṭuan awk a si tiah ahopaoh le mizeipaoh nih i hmaithlak hna usihlaw kan ram sersiam hna usih.


***Ka palhnak a um ahcun a ruahzia nan thiam cio naklai nawl buin…,***

Dinnak kha a cat lomi tiva bantukin luanter camcin ko u.(Amos 5:24)

Salai K. Biak Lian Thawng
O.J.Kaarbøs gate 4
8300 Svolvær

Scroll to Top