Chin Ramkulh Ṭhanchonak Kong Meeting a Tuahmi Mizoram Palik Nih An Tlaih Hna

0 Comments

Aizawl (Mizoram):   Chin ramkulh daihnak le ṭhancho nakding kong he pehtlaiin ton biaruahnak, meeting pakhat cu India ram Mizoram khualipi Aizawl khua ah 31.5.2012 nilini i an tuah lioah Mizoram palik nih an tlaih hna tiah thawng kan theih.

“Peace Process and Mega Development” timi tlangtar in khuakhannak tuah dingah meeting a rak kaimi Chin ramkulh myone ( 9 ) in mibu rianṭuantu hna le biaknak lei hruaitu minung (16) hna cu an tlaih hna le Mizoram ramkulh palik zung ah thong an thlak hna i, Kawl ram ah kuat dingin timhtuahnak an ngeih hna kong thawng theih a si.

Kawl ram cozah le CNF karlak ah zungzal daihnak tuah lio caan i atu bantukin tlaihkhihnak an tuahmi hi cu tuah dingah aa tlak lomi a si tiah Chin Public Affairs Committee in Co-ordinator Pu Thetni nih a chim.

“Atu hi Mizoram palik zungpi ah kan phan, kuat cu an kuat ko hna lai. An kuat hna a si ahcun hruaitu hna caah harnak tampi a um lai. Atu Kawl ram cozah tuahsernak hi zumh thlu awk ding tiang dirhmun an si rih lo. Hi ti an tlaihmi hna hi India cozah si hna seh, Mizoram cozah si hna seh atu bantukin tlaihkhihnak hi an tuah awkah aa tlak lo tiah ka ruah” tiah amah nih cun a chim.

Tlaihkhiahnak a tongmi hruaitu pawl hna cu ni (15) chung ca ramri tannak nawl catlap (Lehmat) aa kenmi, a ngeimi an um bantukin catlap aa ken lomi, a ngei lomi hna zong  an um ve kong theih a si. Minung (50) hrawng nih nithum chung an tuahmi meeting cu atu bantukin a donghnak ni ah tlaihnak an ton hi a si.

Categories: