CCN Secretary Khualtlawnnak Report

0 Comments

Upatmi tuanpi hawi hna,

Ka khualtlawnnak tlawmpal ka hun ttial.

CCN he pehtlai in ka khualtlawnnak

CCN Upa thimtharmi dihlak hnatlaknak in President le Secretary nih khualtlawnnak ngei hna sehlaw CCN kong chimhfiannak ngei hna seh tiah biakhiahnak a um btk in Aurskog, Bagn le Gjøvik khua ka va tlawng kho hna.

Pathian lamhruainak thawngin tlamtlinnak tampi a um tiah ka hmuh.

06.08.2008 Tuesday Aurskog;

Cacawn nihnih ni ah Aurskog khua ah ka va tlawng hna. Ka kal hlan in kan tlawng hna lai tiah thawng ka thanh hmasa hna. Anmah nih rak hong ko tiah lunglawm tein an ka cohlan hnu ah an si ah ka va kal.

A zan u Pu Siang Pum te Inn ah kaa tthum. Sianginn an kai dih caah a thiazing zanlei suimilam 4:00 Pm in tonnak le biaruahnak kan ngei kho hna. Chungkhar lutlai paoh cu an chuak kho dih.

Kan biaruah hramthoknak ah Pu Siang Pum nih thla a kan campiak hnu ah biaruah hram kan thok. Keimah nih CCN lei aiawh in lunglawmhnak biatawi ka chim hnu ah a luan cia CCN tuanbia tawi le a hram rak thokning a tawinak in ka chimh hna i aa tinhmi le a rianttuannak kong zong tawifiang tein ka chimh hna.

Keimah nih biachimnak ka ngeih dih hna hnu ahcun pakhat le pakhat biahalnak le fiang lomi halnak le CCN kongah theih duhmi halnak tete kan ngei.

Saupi biaruah ttinak kan ngei hna. Anmah zong an lung a tho i hmailei CCN rianttuannak ahcun kan lung zong a pian cang caah chimh hau len awkin kan um ti lai lo ti zong an ti. Aurskog khua hi Oslo in suimilam 1:20, ( Tlanglawng kal hnu ah Bus i thlen tthan a si ) hrawng kal a si. Meeting kai tbk ahhin aa harh ngai ding dirhmun i a ummi an si caah an khuami upa dihlak lungtlinnak in CCN- Contact person zong keimah nih thimpinak ka ngeih hna. Pu Mung Tan Sing an thim.

Aurskog khuami hna hi CCN nih a tuah hlan ahkhan Kawlram Cyclone bawmhnak anmah tein thawhburnak an rak tuah cang. Asinain CCN nih timhtuahnak kan ngeih cuahmahmi kong ka chimh hna i an chungkhar dihlak nih lunglawm tein an thawh dih. Upat awktlak taktak an si.

Kan biaruahnak donghnak ah Pu Lian Pa Lung nih thla a kan campiak i kan biaruahnak cu kan dih ter.

08.08.2008 Oslo in Bagn Khua ah

Bagn khua hi Oslo in suimilam 2:50 kal a si. Hi khua ahhin kanmah Laimi an um. Norway an phaknak hi thla 4 lawng an si rih. A ummi hna cu Matupi hna chungkhar ( Pu Peng Lawm ) khat le Falam khua ummi Lungler ( Tin Tin ) nu pakhat an si. An sin kal kal hlan in phone ka chawnh hmasa ve hna. Rak ra ko an ka ti caah lunglawm tein kaa thawh.

Dam tein an si ka va phan kho i biaruahnak zong kan ngei ve. Matupi hna dawng hi Hakha holh an theih sat lo caah Kawlholh kan hmang. Kan biaruahnak le CCN kong ka chimhmi hna zong tlamtling ngai in ka hmuh.

11.08.2008 Oslo in Gjøvik

Gjøvik zong 11.08.2008 Monday ah dam tein ka va tlawng kho hna. Biaruahnak kan tuah. Kan biaruah hramthoknak ah Pu No Thawng nih thla a cam.

CCN rianttuannak kong le hmailei Registration tuahnak ding kongah kan dihlak nih Member fee pek a herhnak kong le CCN hi kan miphun dihlak nih kan dirpi a herhnak kong chimnak ka ngei.

Anmah lei in hal duhmi le biaruahnak kan ngei hna. Kan biaruahnak zong a nuam i tlam a tling hringhran. CCN- Contact person thimnak zong kan tuah. Contact person caah a thimmi cu Pu Tei Cung a si.

Gjøvik khua zong hi anmah tein Kawlram Cyclone bawmhnak a tuah cangmi an si. An thil tuahmi cungah lawmhpi awk le upat awktlak taktak an si.

Mah vial hi caan tawite ka khuatlawnnak kong cu si sehlaw, kan dihlak nih a tang rihmi kan hnaban ah fakpi in kan miphun dawtnak thinlung he caan pek zuam rih hna u sih.

Damte um ahcun Hamar lei le Lillehamar lei kal dingin ka caan kaa tim.

Dawtnak he,

Cung Cem Bik

Categories: