CCN GM Tuahnak Thawngthanh

0 Comments

Norway khuasa Chinmi vialte hna,

Nan dam cio hna maw? Nai hrawng cu thawngpang dangdang nakin Pi Suu Kyi thawngpang nih a kan chilh dih ti khawh asi. Kum 24 chungah a voikhatnak ram leng khual a tlawn khawh si caah le laksawng a rak hmuhmi biapi deuhdeuh a mipum in a lak khawh zong asi caah vawleicung pumpi nih cuanh/zoh cio asi. Pi Suu ton dingah kan miphun tampi zong kan i tel kho ve ti kan theih caah lunglomhnak tampi kan ngei. Miphun pakhat kan sinak zohdawh ngai in a rak langhtertu kan miphun pakhat cio cung lunglawmhnak chimcawklo kan ngei.

Ṭhalcaan (Summer) kan phan ṭhan cang! Chin Community in Norway (CCN) 2010-12 rianṭuannak term zong a tlin cang caah mipi i ton in, upa thimnak tuah ṭhan ding asi cang. Tukum CCN civui hi Hamar khua ah tuah dingin saduhthahnak a rak um bantuk in Hamar khua nupa hna he chawnhbiaknak kan ngei, anmah zong nih a rem an kan ti ve caah lungtho ngai in kan Civui pi cu timhtuah cuahmah asi. Kan Civui a lumsat deuhnak hnga tiin pumpalulh (football) le hlasak (concert) zong um chih dingin timhtuahnak ngeih asi.

Mipi tampi nan rak chuahnak lai kan nin sawm hna.

Kan civui program a tlangpi in zapi sin ah a tanglei bantuk in kan in thanh chung hna. Program tlamtling deuh tu cu a hnu deuhah kan rak thanh ṭhan te lai.

CCN General Meeting

Ahmun: Hamar

A nithla: 18- 20 July 2012

Khual phakni: 18 July

Khual kirni: 20 July

Civui luhnak (registration)

Kan civuipi chung luhnak caah online registration in tuah khawh asi cang. Hika link ah tuah khawh asi.

http://www.eventbrite.com/event/3802770188. Minung pakhat ah NOK 200 asi lai. Inn chungkhar pakhat ah minung pathum silole pathumnak tam kan si ah cun NOK 500 pek ding. Online registration form zoh ah cun, free tiah ai ṭial, aruang cu Paypal le Credit Card an hauh caah free tiah setting kan tuah. Sinain register tuahnak 200 NOK tucu CCN bank account 0539 74 21998 ah pek khawh asi, silole civui a hmun zong ah tawlreltu hna sinah pek khawh zong asi lai.

Football celhnak le concert

Norway in team 3 (Rogaland, Oslo le Hamar) le, Denmark lei in team khat tlun ding in timhtuahnak a um caah team 4 an si te lai. Pumpalulh chuihnak kongah tawlreltu hna le kan miphun i hawikomhnak caah thazang chuah in ai telmi vialte hna nan cungah lunglawmhnak langhter kan duh. Meeting dongh July 19 zaan ah concert um kho ding in timhtuahnak ngeih asi. (Program tlamtling deuh in hnu deuh ah thawngthanhnak kan tuah ṭhan te lai)

Aungbali (Lottery)

Civui tuahnak ah fund kawl a herh caah aungbali zong zuar dingin timhtuah asi. Atu hi Aungbali cu kan tuah dih cang i, mipi nan zapi sinah a rauhhlan ah kan nin zuarh cang hna lai. Lehhmat (ticket) pakhat ah 50 NOK pa 2 ah 70 NOK le pa 3 ah 100 NOK in kan zuar lai. Khua pakhat cio ah ṭuanvo kan i thiahmi hna nih an rak zuar te lai.

NCCF, krihfa buu le fellowship hna sinah nawlnak

Civui tuahnak budget kan suai tikah CCN nih phaisa lut a ngeihmi nih a zat lo caah Norway krihfa kan i hruainak NCCF le Chinmi krihfa buu le fellowship hna sinah bawmhnak hal ding in timhtuahnak kan ngei. Rianṭuantu upa hna nan sinah bawmhnak halnak ca kan ṭial lio asi i a phan chawm te lai. Ca kan nin kuat hlan hna hrim in na thinlung chung ah nan kan ruah piak ding ah kan nin nawl cia hna ko.

Rawlchumtu ding hna

Civui lio rawlchumtu ding ah a tanglei bantuk in kan suai chung

18 July 2012 [Khual phak zan inntek]

19 July 2012[ Zinglei :Oslo area]

19 July 2012 [ Zanlei :Rogaland area]

20 July 2012 [Khual kir ni :Bawlung zuamnak i Champion a hmumi paoh nih ṭuanvo lak ding]

Security ṭuanvo la ding

Zan Security ṭuan dingmi hna hi a biapi tukmi a si caah Rogaland in minung 10, Oslo area in minung 10 le inntek Hamar upa cawh in minung ṭhen ding in ruah asi. Hi Security ṭuan dingmi minung thim ding hna hi khua, area cio CCN upa te nih kan ṭuan piak cio ding in nawl nan si.

– Acunglei program a tlangpi thawngthanhnak pinlei ah hal duhmi a fiang lomi um ah cun CCN sin ah biahalnak tuah khawh peng asi lai i, mah nak in fiangdeuh in thawngthanhnak kan rak tuah ṭhan te lai.

Khual tlunnak kong le Hamar khuachung transport kongah Pu Van Za Uk (Mob: 99514177 ) chawnh khawh asi lai. Amah zong nih zapi sinah fiangdeuh in thawngthanhnak a kan tuah te lai.

Upatnak he,

Chin Community in Norway

Categories: