NBU (Norwegian Baptist Union), CCN (Christian Council of Norway) le KIA (Kristent Interkulturelt Arbeid) komh in an tuahmi ‘Diaspora Kurs’ silole laiholh in ‘zalzaam mibuu hna caah cawnpiaknak’ cu June 14-17 tiang, Holtekilen Folkehøyskole/HLT, Stabekk ah an tuah. Cawnpiaknak ah minung 31 a kaimi kan si i, buu 21 ai kan awh hna. Kanmah Chinmi chungin a kai khomi hna; Steven No Thawng (NCCF), Pastor Ceu Mang (NCCF), Pu Thang Hlun (NCMC), Peter Ngai Dam (NBU), Salai Cung Cem Bik (CCN), Mary Hram Sui (FCF)le Peter Sang Lian Thang (CCN) hna kan si. Karen kan hawi le zong minung 9 an ra ve, a dang pawl hi Africa leiin a rami an tambik i Asia zong an um ve.
Cawnpiaknak nih ai timhmi
Norway nih kum tin te ramleng bawmhnak phaisa billion in a pek. Kum 2010 ah ramleng bawmhnak a pekmi hi Norway kroner in billion 27 a phan. Hi phaisa vialte hi ram dangdang ah; zawtfah khamkhen-thlawpbulnak, fimthiamnak cawisannak, sifakmi tawdawmh in tthanchoternak, ralzaam hna bawmhnak, democracy zumhning a karhnak caah rianttuantu hna bawmhnak tibantuk ah hman asi tawn. Phaisa nih bawmhmi minung hna sin a phanh khawhnaak caah, a karlak ah rianttuantu buu tampi an um. Cozah le bawmhmi hna karlak rianttuantu buu an rianttuan kong kha- a dang buu fa deuhdeuh asimi a chung taktak lut in a ttuanmi hna nih fiang tein theih kha biapimi pakhat asi.
Norway ramdang lei rian tlaitu Ministry zung nih phaisa a zamh tik ah phaisa a phanh hmasa biknak buu dangdang bianaah; NORAD tibantuk buu hna ah buu fa deuh dangdang hna nih zeitindah phaisa sok asi i, zeibantuk rianttuannak hna khi dah phaisa bawmhnak an pek hna, cun zeibantuk rianttuannak khi dah biapideuh ah an chiah piak tawn hna i phaisa bawmhnak an peek deuh tawn hna tibantuk thilsining vialte kha cawnpiak mi cu asi.
Cawnpiaktu saya te minung tampi an ra, a rami hna hi tamdeuh cu phaisa bawmmi- bawmhnak hmumi buu hnaah biapimi rianttuantu hna an si, i pumpak in sianginn satang sang a kai i, hlathlaitu dirhmun (researcher) zong an ra ve i an rianttuannak kong chimh fiannak a kan ngeih. Hi cawnpiaknak nih ramdang buu hna nih anmah le ram cio, tthanchonak an ttuan tikah ningcang tein an ttuan thiam i ruahnak kaudeuh an ngeih khawhnak kha biapi in ai timhtuahmi asi. Phaisa sok ning le a tawnghthamning, project ningcang tein suaining le zeibantuk buu hna sinah kalpi sokding tibantuk le, kanmah bantuk buu dangdang hna he theihnak-pehtlainak rianttuanttinak lampi umtuning timi pawl biapi in cawnpiak kan si.
Lunghmui ngai in kan dih
Cawnpiaknak cu ni 4 chung a si i, umnak le rawl ti vialte anmah tawlreltu hna nih dangh asi fawn. Kanmah Burma mi kan i hmuh ton lawng siloin ram dangdang in a ra ve mi hna an rianttuannak, an hmuh-ton tete zong chapnak kan ngei kho i san a rak tlai hringhrang ko. A dihni ah cawnpiaknak a kai i ttha tein a lim ko timi a langhtertu “catlap” – Kurs Bevis an kan peek. Hmailei kan ram tthanchonak caah rianttuannak ah santlai si hram seh ti hi kan thlacamnak asi.