Aung San Suu Kyi Norway a Ra Lai

0 Comments

Burma democracy hruaitu le daihnak kongah vawleicung nih upatmi Pi Suu Kyi cu June 15- 18 tiang Norway ah rat ai tim. Norway khuapibik asimi Oslo ah Nobel daihnak laksawng a rak hmuhmi pumpak in laaknak le biachimnak a ngeih pinah Norway khuasa Burma ram rami hna zong he tonnak le biaruahnak ngeih ding in timhtuah cuahmah asi tiah theih asi.  Norway Prime Minister le Ramdanglei vuanci hna a ton hna lawng siloin dainak laksawng a rak pe hmasa mi hna Norway khuapibik a pahnihnak Bergen zongah va kal in, Norway minung pawl he ton le biachimnak Burma rammi hna he biaruah/lehnak tete zong ngei ding in timhtuahpiak asi.

“Ramdang khual na tlawn khawh ahcun zei ram ah dah na kal hmasat lai?” ti an rak hal pohah Suu Kyi nih a chim tonmi cu, Norway hi kal ka duh hmasabik ko a ti tawn. A ruahnak bantuk in thil a kal thiam ve lo caah Thailand ah World Economic Forum, vawleicung chawlehnak le phaisa kong ceihnak forum pi nih an sawm caah a va kal. Thailand a caam chung zongah kanmah Chinland Guardian nih a rak ruahnak a rak ttial bantuk tein, Ralzaam hna khuasak nak ah minung a thong in a va ton hna lawng siloin Thailand Burma ralzaam umnak Camp nganbik tiang a mah pumpak in a va kal.

Europe lei a rat tik zongah Norway cu aram khatnak asi thiam hawi lo, aruangcu Switzerland ah International Labour Conference a um hawi, cu ah cun an sawm caah kal ta ai tim tthan. Emnesty International nih laksawng an pekmi cu vawleicung hlasak thiam minthang Bono nih pek a timh ti asi. June 13- 15 tiang Switzerland ah a um hnu lawng ah Norway lei rat khawh dawh asi.

Norway ah Chinmi kan tambiknak hi Rogaland asi. Chinmi minung 500 tluk kan um lai ti ruah asi i, Burma in a rami kan zapi cun 600- 700 hmanh kan si kho men tiah ruah asi. Cucaah Pi Suu Kyi cu hi hmunhma ah ra kho ve seh ti cu rak duhtuk asi caah, a phunphun in CCN siseh Chinmi an kan dawtu buu hna nih zuampiak asi. Stavanger Unviversity zongnih upatnak Doctor an pek, Sandnes Kommune le Stavanger Kommune zong nih sawmnak le Suu Kyi ratter an duhnak an langhter. Tutiang ah an duhnak Norway cozah lei nih timhtuah piaknak a um lo caah khua hnih lawng ah kal ding in donghnak timhtuah asi.

Oslo siseh, Bergen khua ah siseh Suu Kyi a rat tikah kanmah Chinmi a tong kho mi poh nih kal/ton ve i tim cio hna usih!   Norway minung hna zong nih sunglawi ngai in dawn an timh ti thawng theih asi. Culakah kanmah Burma rammi hna nih kan caah mi biapi, zumhawktlak minung pakhat asimi hruaitu pakhat kan ram aiawh in le miphun hna ai awh in laksawng nganpi le mi phun dang hna nih cawnglawmhnak an tuah tik ah kan chuah khawh tawk thazaang chuah in i tel kho cio hna u sih tiah zapi sawm nan si.

Categories: