Vawleicung silei hlathlainak nih an rak hmuh-ton ballomi, tihnung zawtnak lungrul E-coli phunkhat nih EU ah a tlawmbik minung 17 a thah cang hna i, minung 2000 hrawng an zawtter cang hna ti asi. E-coli zawtnak lungrul hi a phunphun in a um; cheukhat cu rawl kan ei mi maanternaak ah a bawmtu si phunkhat asi, nain tutan an hmuhmi cu bawmtu siloin minung kan ‘kal’ thazaang a derter lawng siloin a rianttuannak a hrawh khawh caah nunnak tiang a la khomi zawtnak asi. Lungrual a rak hmu hmasatu pa hi Theodor Escherich ti asi caah a min hnulei “E” laak in sakmi zawtnak lungrual min asi. Tutiang thawngpang theih tawk ah lungrul ai thawknak, khawzeiindah a rat timi an theih khawh rih lo caah sii lei hlathlaitu pawl an buai lio pi asi ko.
Norway eidin lei zohcawngtu buu (Mattilsynet) nih an website chungah; ” Norway ah zuarmi anhring hnah le thlaithei hna cu ei awk ah an him ko rih” tiah thawng an thanh. Lungrul an rak hmuh hmasanaak Germany le Spain cozah le ngandamnak lei ttuanvo ngeitu zung hna he chunzan in pehtlainak kan ngeih peng ko caah, zawtnak a hrampi an hmuh cangka in thawngpang update kan rak tuah zungzal lai ti asi. BBC source pakhat nih a chim ve ningah; hi lungrul zawtnaak a hrampi taktak cu hmailei zongah kan thei kho thai ti men lai lo ati ve. Norway ah cun hi kongah hnangam asi rih ti khawh asi. E-coli lungrul belte Norway zuarmi zil ah an hmuh ve caah mipi thinphan dailoin an um ve ko.
Germany zongah i ralrinbik awk ah an thanhmi cu, khayanchin, salat le zil hna hi an si. Nain a dang anhring phun dangdang zongah hi zawtnak hi fawi tein a um khomi asi caah, chekhlattu hna nih a ttha ko an tilo mi cu ei loah a ttha bik tiah ruahnak peek asi. Russia hna nih cun, Spain le Germany in a rami anhrinhnah luhter lo ding in a khap (http://www.vg.no/nyheter/utenriks/artikkel.php?artid=10094462.) Russia ram ah anghring hnah le thei tambik a zuartu ram hi China le Turkey an si (CNN news). Hi zawtnak ruangah dum/lo ngei pawl an phaisa luh a tla deuh ngaingai, zartkhat ah an sunghmi hi USD million 290 tluk asi tiah BBC nih a ttial.