Phunghram-Lai

CCN-Phunghram [Constitution]

Biahmaiṭhi [Preamble]

Kawlram ralkap cozah tthat lo ruangah hremnak le harnak phuntling kan tuar leng ah nunnak ca pawmcawm kawlhawlnak tiang in a har cang caah Chin miphun tampi cu 1990 thawk in kan ram kan chuah tak i ralzam dirhmun in vulei khuaza ah kan i tthek dih hna.

Cuticun 2002 ah Norway ram zong kan rak phan. Milurel kan hun tam deuh caah kan phun ning in i zohkhenhnak le kilvennak leng ah Kawlram le Chin mi hna nuhrin covo, democracy phung le tthanchonak caah 26 July 2004, Froland ah Chin Community in Norway (CCN) cu zapi lungtling in kan dirh. 2012 ah cun milurel 1,500 fai kan si cang.

CCN phunghram cu August 11, 2008, CCN forum ah CCN EC nih a fehter i July 27, 2012, Hamar, CCN General meeting ah a chuahpi. CCN GM nih zei maw zat a remh i a fehter hnu ah cu ni 27.07.2012 thawk in hi phunghram cu hman a si.

§ 1.  Min le Umnak [Name and Location]

1.1. Hi bu cu Chin Community in Norway tiah auh a si lai. A tawinak in CCN ti a si lai. 1.2.CCN umnak cu Norway ramchung ah a si lai.

§ 2. Tinhmi [Aims and Objectives]

2.1. Norway um Chin mi hna rualremnak, zohkhenhnak le thanchonak caah rian a ṭuan lai.

2.2. Chin mi hna Norway sining le nundan i lak zia thiam awk (integration) ah a bawmh lai.

2.3.Chin mi hna nuhrin covo le thanchonak ca rian a tuanmi bu le Kawlram democracy caah rian a tuanmi bu hna a bawmh hna lai.

2.4. Chin ralzam (refugees) hna kha a si khawh chung in a bawmh lai.

2.5. Chin nunphung le Chin ca a kilven lai i thanchonak caah a bawmh lai.

2.6. Chin National Day cu upatnak a ngeih lai, tawlrel khawh ai zuam lai.

§ 3. Chungtel sinak [Membership]

3.1. Hi bu ah Norway um Chin a simi poah member sinak nawl an ngei lai.

§ 4. Bu Dirhmun le tungtlang umtu ning [Organisation polity and structure]

4.1. CCN cu Democracy phung in aa hruaimi le miaknak a kawl lomi Bu (Non profit organization) a si caah mi pakhat nih amah pumpak miakmai kawlnak ah CCN a hman ahcun cu Nu/Pa cu CCN nih a kong ceih a si lai.

4.2. CCN riantuannak ah a sang bik nawl ngeitu cu member dihlak tel in kum hnih (2) dan ah voi khat tuahmi CCN General Meeting (CCN GM) a si lai.

4.3. GM cu CCN EC upa fehtertu le rianttuantu upa (Office Bearer) hna thimtu a si lai.

4.4. GM nih rianttuantu upa (OB) le ruahnak petu upa hna cu a tanglei bantuk in a thim lai.

4.4.1. President

4.4.2. Vice president

4.4.3. Secretary

4.4.4. Assistance secretary

4.4.5. Treasurer

4.4.6. Assistance treasurer

4.4.7. Auditors pa hnih

4.4.8. Ruahnak petu pa hnih

§ 5. Upa hna rianttuan caan le Kum [Term]

5.1. Rianttuantu ca caan (Term) cu term khat ah kum hnih a si lai.

5.2.CCN kum cu January 1 in December 31 tiang hi kum khat ah rel a si lai.

5.3.Mipi nih kan duh ko hna ah cun, zeitik caan tiang poh ṭuan khawh a si lai.

5.4.Caan karlak a longmi cu EC upa nih aiawhtu thimnak nawl a ngei lai.

§ 6. Phunghram remhnak

6.1.Phunghram cu general meeting kaimi member cheuthum cheuhnih (3/2) nih fehter a si lai.

6.2.GM (2/3) lungtlinnak thiam in a herh an ti ahcun remh khawh le chap khawh a si lai.

§ 7. Buu hrawhnak

7.1. CCN cu kan herh ti lo, hrawh si ko seh tiah ceih asiahcun General Meeting kaimi 75% nih hnatlaknak in hrawh a si lai.

7.2. CCN hrawh a si ahcun angeihmi thilri le phaisa cu Norway um Chin aiawhmi buu pakhat khat ah pek a si lai.

Phungtteng ( Bylaws ) 

1. Membership Fee

1.1. Kum 18 cung member a simi poh nih kum tin member fee Kr. 100 pek a si lai.

1.2. Member pakhat nih Bu in chuah a duh ahcun a chuah duhnak kong he zoh chun in EC upa hna nih a kong ceih piak a si lai.

1.3. Member pakhat nih member sinak in a chuah a si ahcun member fee a thawh ciami khirh tthan a um ti lai lo.

1.4. Member hna covo le ṭuanvo

1.4.1. Member pakhat nih bu caah ṭhahnem santlai asimi ruahnak chuah khawh a si, bu rianṭuannak ah telnak nawl a ngei lai.

1.4.2. Member fee a pemi hna lawng khua cio EC upa caah thim khawh an si lai.

1.4.3. Member fee a pemi lawng nih meeting ah mee (vote) peknak nawl a ngei lai.

1.4.4. Member a si ko nain meeting a kai lo ahcun aiawh mee pekpiak khawh a si lai lo.

2. General Meeting (GM)

2.1. GM meeting cu member dihlak sawm in kum hnih dan ah voi khat tuah a si lai.

2.2.GM cu CCN rianttuannak report, phaisa cazin report le budget fehtertu a si lai.

2.3. GM paoh ah Phaisa lutchuak zoh tthannak le ceihhmainak a um lai.

2.4. GM ah member a si lomi kai khawh a si lai nain vote peknak nawl a ngei lai lo.

2.5. GM cu President le Secretary hruainak in tuah a si lai.

3. Executive Committee (EC) meeting

3.1. EC meeting cu thla ruk dan ah voi khat tuah a si lai.

3.2. EC cu CCN policy phortu le CCN tthanchonak ttuanvo ngeitu bik an si lai.

3.3. EC nih a herh ning in program, project le committee a ser khawh lai.

3.4. A herh an ti ahcun CCN GM emergency meeting a auh khawh lai.

3.5. EC meeting quorum cu hnarcheu nak tam (51%) in a si lai.

3.6. Quorum an tling lo i a herh tuk ahcun President nih emergency meeting a auh khoh lai.

3.7. Meeting poah ah mi tam deuh hnatlaknak in bia khiah a si lai.

3.8. Caan karlak a lawngmi rianttuantu upa thimnak nawl a ngei lai.

4. EC Upa thimnak

4.1.Chin milurel 25-50 kar umnak khua in CCN ah EC aiawhtu upa pa khat thlah a si lai.

4.2.Milurel 50 nak cung umnak khua in in CCN EC aiawhtu upa pa hnih thlah a si lai.

4.3.A herh ahcun at large EC member upa 3 thim khawh a si lai.

4.4. Khua cio in EC upa thimmi hna cu anmah tein rianttuantu upa (office bearer) thimnak an ngei lai.

5. EC upa hna ṭuanvo le nawlngeihnak

5.1. President

5.1.1. CCN EC aiawhtu le CCN tthanchonak ah ttuanvo ngan bik ngei a si lai.

5.1.2. CCN GM le EC meeting hruaitu a si lai.

5.1.3. Aherh tuk ahcun CCN EC Emergency meeting auh nak nawl a ngei lai. 

5.1.4. Rian tuanmi poah EC ah ruahnak halnak le biaruahnak a ngei hmasa zungzal lai.

5.1.5. Emergency thil pakhat a chuah ahcun thil sining zohchih in biakhiahnak nawl a ngei lai.

5.1.6. Herh pang a um ahcun secretary he ceih in kr.1,000 tiang hmannak nawl a ngei lai i a neih bikmi EC ah a chuahpi lai.

5.2. Vice president

5.2.1. President a um lo caan ah a aiwh lai i president nih a herh a tining in ttuanvo a pek lai.

5.3. Secretary

5.3.1. Buu chung riantuannak catlap, records le meeting minutes vialte a kilkawitu a si lai.

5.3.2. CCN ca lut ca chuak tlaitu le a herhmi ca a caan hman tein thlahtu a si lai.

5.3.3. President le EC upa hna hnatlaknak in ca lut ca thlah a tuah lai.

5.3.4. Buu chungtel vialte cazin tha tein a tuah dih hna lai.

5.4. Assistance Secretary

5.4.1. Secretary rian a bawmtu asi lai. Secretary a um lo tik ah secretary tuanvo vialte a tlai dihtu a si lai.

5.5.Treasurer

5.5.1. CCN ngeihmi phaisa poah cu CCN bank account in a ken lai.

5.5.2. Phaisa cazin a tlaitu le phaisa hmannak cazin a tuahtu a si lai.

5.5.3. Amah nawl in bu phaisa le bank account hmannak nawl a ngei lai lo.

5.5.4. Buu nih a ngeihmi phaisa a lutchuak cazin kha EC upa le member hna sinah thawngthanhnak a tuahtu a si lai.

5.5.5. Auditor hna nih check hnu lawngah mipi sinah cazin a chuahpi lai i a thanh lai.

5.6. Assistance Treasurer

5.6.1. Treasurer a bawmtu a si lai.

5.6.2. Treasurer aum lo sual ahcun, President le secretary theihpinak in Treasurer aiawh in a tlaitu a si lai.

6. Bu Phaisa

6.1. Kawlnak

6.1.1. CCN phaisa cu member hna nih kum tin an pekmi membership fee a si lai.

6.1.2. CCN nih a ngeihmi cawlcanghnak program le project chirchanh in EC upa hna hnatlaknak in phaisa kawl (fund raising) a si lai.

6.2. Hmannak

6.2.1. CCN ngeihmi phaisa cu CCN EC hnatlaknak in hman khawh a si lai.

6.2.2. CCN ngeihmi phaisa cu mizei hmanh nih amah pumpak nawlngeihnak in hmannak nawl a ngei lai lo.

6.2.3. CCN rianttuannak i a herhmi phaisa cu EC upa hna nih a herhning zoh chun in mipi sinah tlawmh hal le fund kawl a si lai.

7. By-laws fehternak le remhnak

7.1. By law cu GM le EC nih ser khawh a si lai, i EC meeting kai hnarcheu nak tam kaimi hna tlak nak in remh khawh chap khawh a si lai.

Scroll to Top